Rossiya prezidenti Vladimir Putin AQSh prezidenti Barak Obama bilan telefon suhbatida uni Ukrainada kuch ishlatilishi va qon to‘kilishi oldini olishda Amerika tomonida mavjud barcha imkoniyatlarni ishga solishga chaqirdi. Bu haqda “ITAR-TASS” xabar berdi.
Putin Ukrainaning Donetsk, Xarkov, Lugansk, Slavyansk va boshqa janubi-sharqiy shaharlaridagi norozilik harakatlari Kiyevdagi rahbariyatning rus va rus tilli aholi manfaatlarini hisobga ola bilmasligidan kelib chiqqanini ta’kidladi.
Shuningdek, Rossiyaning Ukrainadagi voqealarga aralashuviga Obamaning bildirgan tashvishiga javoban, Rossiya prezidenti bunday ma’lumotlarning asossiz ekanini aytdi.
“Ukrainaning hozirgi hukumati birinchi navbatda barcha siyosiy kuchlar va hududlarni fuqarolar huquq va erkinliklarini, mamlakat federativ tuzilishini kafolatlaydigan yangi konstitutsiya ishlab chiqish jarayoniga jalb etishni o‘ylashi kerak ”, — dedi Putin.
Mamlakat rahbarlari 2014-yil 17-aprelda Jenevada bo‘lib o‘tadigan to‘rt tomonlama (Yevroittifoq, Rossiya, AQSh, Ukraina) uchrashuv arafasida Ukarainadagi vaziyat yuzasidan diplomatik hamkorlik yo‘llarini qidirish bo‘yicha muzokaralarni davom ettirishga kelishib oldi.
Izoh (0)