Afg‘oniston prezidenti saylovlarida berilgan ovozlarni hisoblash jarayonidagi hozirgi ma’lumotlarga ko‘ra, unda muxolifat ko‘rsatgan nomzod – Abdulla Abdulla 41,9 foiz ovoz bilan yetakchilik qilmoqda. Ikkinchi o‘rinda esa G‘arbga moyil nomzod – sobiq moliya vaziri Ashraf G‘ani ketmoqda; uni elektoratning 37,6 foizi qo‘llab-quvvatlagan. Bu haqda 13-aprel kuni Reuters xabar qildi.
Prezident saylovi 5-aprel kuni bo‘lib o‘tgan; hozircha Afg‘oniston Mustaqil saylov komissiyasi saylov varaqalarining 10 foizinigina hisoblab ulgurgan. Shu sababli e’lon qilingan natijalar taxminiydir. Komissiya rahbari Yusuf Nuristoniy so‘zlariga ko‘ra, hozircha 500 mingdan oshiqroq ovozlar hisoblab chiqilgan. Saylovda esa mamlakatning yetti milliondan oshiq aholisi ishtirok etgan, deb yozadi The Washington Post.
Afg‘oniston qonunchiligiga ko‘ra, prezident saylovida 50 foizdan kam bo‘lmagan miqdorda ovoz to‘plagan nomzodgina g‘olib, deb topiladi. Ammo mamlakat sobiq tashqi ishlar vaziri Abdulla Abdulla o‘z g‘alabasiga ishonmoqda. U saylovda rasman g‘alabaga erishganidan keyin hukumatni milliy yaxlitlik asosida shakllantirishni ko‘zlashi bilan birga raqibiga vazirlar mahkamasidan joy ajratmasligini ham ma’lum qilgan.
1960-yilda tug‘ilgan Abdulla Abdulla “Afg‘oniston milliy koalitsiyasi” muxolifat partiyasiga rahbarlik qiladi. Ma’lumoti bo‘yicha oftalmolog bo‘lgan Abdulla sho‘rolarning mamlakatdagi harbiy kampaniyasi yillarida dala komandiri Ahmad Shoh Mas’udning yaqin safdoshlaridan edi. Hamid Karzay rahbarligi davrida, 2001–2005-yillarda esa u tashqi ishlar vaziri lavozimida ishlagan. Abdulla Abdulla 2009-yilgi prezident saylovlarida 30,6 foiz ovoz bilan ikkinchi o‘rinni egallagan.
Izoh (0)