Bahor-yoz mavsumida suv oqimlarini xavfsiz o‘tkazib yuborish maqsadida, joylarda daryo o‘zanlarini tozalash, qirg‘oqlarini mustahkamlash tadbirlari bilan bog‘liq taktik-maxsus o‘quv mashqlari o‘tkazilmoqda. Bu haqda FVV matbuot xizmati xabar berdi.
2014-yilning 8-aprel kuni Qashqadaryo viloyatining Chiroqchi tumani hududidan oqib o‘tuvchi Qashqadaryo daryosida, Xorazm viloyatining Gurlan tumani hududidagi Amudaryo qirg‘og‘ida, Sirdaryo viloyatining Guliston tumanidan o‘tgan Sirdaryo daryosining qirg‘og‘ida hamda Buxoro viloyatining G‘ijduvon tumanidan o‘tuvchi “Bosh Shofirkon” kanali va Toshrabod suv taqsimlash inshootida ana shunday o‘quv mashg‘ulotlarning navbatdagisi o‘tkazildi.
Ularga jami 765 nafar Fuqaro muhofazasi tuzilmalari shaxsiy tarkibi vakillari hamda aholi, 68 ta muhandislik va maxsus texnika jalb etildi. Profilaktik tadbirlar davomida 550 kub metr tuproq, 95 kub metr tosh va shag‘al ishlari bajarildi.
Reja asosida uyushqoqlik bilan o‘tkazilgan tadbirlar natijasida o‘quv mashg‘ulotlaridan ko‘zlangan maqsadlarga to‘liq erishildi. Mashg‘ulot yakunida amaliy ishlar tahlil qilinib, ularni kelgusida boshqa tegishli tumanlardagi uchastkalarda ham davom ettirilishi yuzasidan o‘zaro kelishib olindi.
Izoh (0)