Toshkent shahridagi badiiy gimnastika bo‘yicha bolalar-o‘smirlar respublika ixtisoslashgan olimpiya zaxiralari sport maktabida o‘smirlar va qizlar o‘rtasida sport gimnastikasi bo‘yicha Osiyo chempionati boshlandi. Musobaqaning dastlabki kunida o‘g‘il bolalar brus, turnikda mashqlar bajarish, shuningdek, tayanib sakrash va erkin mashq bajarish kabi yo‘nalishlar bo‘yicha o‘z mahoratini namoyish etdi. Bu haqda O‘zA xabar berdi.
O‘zA ma’lumotlariga ko‘ra, Osiyo chempionatida qit’a mamlakatlaridan 260 dan ziyod gimnastikachi, murabbiy va mutaxassislar qatnashmoqda. O‘smir yigitlar o‘rtasidagi musobaqalarda O‘zbekiston sharafini Temur Qodirov, Elyor Islomov, Aziz Saidumarov, Hamid Sodiqov va Mirafzal Fozilov himoya qilmoqda.
— Osiyo miqyosidagi mazkur nufuzli musobaqaning aynan O‘zbekistonda o‘tkazilayotgani bejiz emas, — deydi xalqaro toifadagi hakam Savita Marate (Hindiston). — O‘zbekistonda nufuzli musobaqalarni o‘tkazish uchun barcha sharoit yaratilgan, o‘zbek gimnastika maktabi qit’ada o‘zining yuksak mavqeiga ega.
— Jamoamiz bilan turli nufuzli xalqaro musobaqalarda muvaffaqiyatli ishtirok etib kelyapmiz. Toshkentda o‘tkazilayotgan Osiyo chempionatida ham o‘z mahoratimizni namoyish etib, yurtimizga yorug‘ yuz bilan qaytish istagidamiz, — deydi yaponiyalik gimnastikachi Koko Dobashi.
Eslatib o‘tamiz, Xalqaro gimnastika federatsiyasi ko‘magida Osiyo gimnastika ittifoqi, O‘zbekiston gimnastika federatsiyasi, Madaniyat va sport ishlari vazirligi tomonidan tashkil etilgan musobaqa qit’a gimnastikachilari uchun joriy yil 16—28-avgust kunlari Xitoyning Nankin shahrida o‘smirlar o‘rtasida bo‘ladigan II Olimpiya o‘yinlariga yo‘llanma beradigan saralash turnir hisoblanadi.
– O‘zbekiston, uning tarixi va madaniyati haqida ko‘p eshitardim. Ushbu musobaqa bahonasida shunday go‘zal va qadimiy yurtga kelganimdan xursandman, — deydi Shri-Lankadan kelgan murabbiy Ranjana Tranga Veladaj. — Vaqt topib, Toshkentning noyob tarixiy obidalari, zamonaviy inshootlari, so‘lim ko‘cha va xiyobonlarini tomosha qilmoqchiman.
Chempionat bahslari davom etmoqda.
Izoh (0)