Aprel oyida bo‘lishi kutilayotgan sovuqlar sabab O‘zbekiston meva hosilining 35 foizidan mahrum bo‘lishi mumkin. Bu haqda O‘zbekiston qishloq va suv xo‘jaligidagi manbaga asoslanib, “RIA Novosti” axborot agentligi xabar berdi.
“13—15-aprel kunlari havo harorati pasayishi kutilmoqda, o‘tgan hafta esa mevali daraxtlarning gullari g‘uncha ochgan edi. Bu yakuniy hosilga sezilarli salbiy ta’sir ko‘rsatishi mumkin”, – deydi agentlik manbasi.
Manbaning so‘zlariga ko‘ra, eng yaxshi holatda O‘zbekiston kutilgan hosil hajmining kamida 20 foizidan mahrum bo‘ladi.
10—12-aprel kunlari O‘zbekiston bo‘ylab yomg‘ir yog‘ishi, 12-aprel kuni kechga tomon alohida hududlarda qor yog‘ishi kutilmoqda. 13—15-aprel kunlari esa havo harorati -1 darajagacha tushib ketishi prognoz qilingan.
Qayd etish joiz, 8-aprel kuni Toshkent shahri va boshqa bir qator hududlarda havo harorati kutilmaganda keskin pasayib, qor yog‘gan edi.
“Kun”ning ma’lumotiga ko‘ra, 2013-yil yakunlariga ko‘ra O‘zbekistonda meva va sabzavot yetishtirish hajmi 8,4 foizga oshib, 10,6 million tonnani tashkil etgan edi.
Izoh (0)