Xalq deputatlari Toshkent shahar Kengashining ijtimoiy-madaniy rivojlanish masalalari bo‘yicha doimiy komissiyasi “Iste’molchilarning huquqlarini himoya qilish to‘g‘risida”gi qonunning ijrosini ta’minlash yuzasidan bo‘lib o‘tgan yig‘ilishda poytaxtda amalga oshirilayotgan ishlar to‘g‘risida mutasaddi tashkilotlarning hisobotlari eshitildi. Bu haqda Biznes-Daily xabar berdi.
Davlat raqobat qo‘mitasi Toshkent shahar hududiy boshqarmasiga 2013-yili fuqarolardan jami 536 ta ariza va shikoyat kelib tushgan. “Ishonch telefoni” orqali esa 391 ta murojaat bo‘lgan. Ulardan 603 tasi kommunal xizmat, 129 tasi savdo va umumiy ovqatlanish, 90 tasi xizmat ko‘rsatish hamda 106 tasi esa boshqa sohalarga tegishli bo‘lgan. Murojaatlarning aksariyat qismi kommunal sohaga taalluqli bo‘lganligi bois, shikoyatlar “Toshissiqquvvati” va “Maxsustrans” ishlab chiqarish birlashmalari, “Toshshahargaz” filiali, Toshkent shahar elektr tarmoqlari va “Suvsoz” davlat unitar korxonalari, Toshkent shahar xususiy uy-joy mulkdorlar shirkatlari uyushmasi mutaxassislari bilan birgalikda ko‘rib chiqildi. Ularni o‘rganish mobaynida 408 ta holat bo‘yicha fuqarolarning iste’molchi sifatida buzilgan huquqlarini tiklashda amaliy yordam ko‘rsatildi.
Murojaatlarni ko‘rib chiqish natijasida iste’mol qilinmagan gaz uchun “Tashshahargaz” filiali va uning tuman bo‘limlari tomonidan asossiz hisoblangan 96 million so‘mdan ziyod mablag‘ iste’molchilarning foydasiga hal etildi. Qonun buzilish holatlariga yo‘l qo‘yganligi uchun “Toshshahargaz” filialiga nisbatan belgilangan tartibda ish qo‘zg‘atilib, eng kam oylik ish haqining 200 barobari miqdorida, ya’ni 15 918 000 so‘m miqdorida moliyaviy jarima qo‘llanildi.
Izoh (0)