Toshkentda ochilgan tibbiyot sohasidagi ko‘rgazmalarda 20 mamlakatdan 150 kompaniya o‘z mahsulotlarini namoyish etdi

9-aprel kuni “O‘zekspomarkaz”da “Sog‘liqni saqlash – TIHE 2014”, “Farmatsevtika sanoati – AptekaExpo Central Asia 2014” hamda “Stomatologiya – Stomatology Uzbekistan 2014” xalqaro ko‘rgazmalari ochildi. Bu haqda O‘zA xabar berdi.

Tadbirlar O‘zbekiston Respublikasi Sog‘liqni saqlash, Tashqi iqtisodiy aloqalar, investitsiyalar va savdo vazirliklari, Savdo-sanoat palatasi, “O‘zfarmsanoat” davlat aksiyadorlik konserni, “O‘ztibtexnika” mas’uliyati cheklangan jamiyati, Stomatologlar uyushmasi bilan hamkorlikda ITE Uzbekistan xalqaro ko‘rgazma kompaniyasi tomonidan tashkil etildi.

Bu yilgi ko‘rgazmalarda Avstriya, AQSh, Belarus, Belgiya, Buyuk Britaniya, Germaniya, Xitoy, Yaponiya, Hindiston kabi yigirmadan ortiq mamlakatdan bir yuz ellikka yaqin kompaniya o‘z mahsulotlari va xizmatlari bilan ishtirok etmoqda. Pavilyonlarda zamonaviy tashxis apparatlari, ortopediya, stomatologiya, implantologiya va jarrohlik asbob-anjomlari, dori-darmonlar namoyish qilinmoqda.

Ko‘rgazma doirasida ilk marta “Tibbiyot turizmi” sho‘basi ham tashkil etildi. Unda University Medical Center Freiburg (Germaniya), “Kardiolita” (Litva) va Acibadem Hospitals Group (Turkiya) kabi tibbiyot muassasalari sog‘lomlashtirish xizmatlari bilan ishtirok etmoqda.

Ko‘rgazmalar mamlakatimizga xorij sarmoyasini jalb etish, farmatsevtika, stomatologiya va tibbiyot turizmini yanada rivojlantirish, chet ellik sheriklar bilan hamkorlikda qo‘shma korxonalar tashkil etish, sohaga oid talab va takliflarni o‘rganish hamda tovar ayirboshlashni kengaytirishga xizmat qiladi.