Rossiyalik jarrohlar dunyoda birinchi bo‘lib yordamchi robot tizimi – da Vinci asosida plastik jarrohlikni amalga oshirishdi. Bungacha ushbu moslama asosan kardiologiya, urologiya va ginekologiyada qo‘llanilar edi, deb yozadi Gazeta.ru.
To‘rt qo‘lli da Vinci qurilmasi uzoq davom etadigan operatsiyalarni ham eng yuqori darajada sterillangan sharoitlarda o‘tkaza oladi. Bunda jarroh masofadan turib, robotni joystik yordamida boshqaradi. Kamera esa operatsiya qilinayotgan joy tasvirini bir necha marta kattalashtirilgan holatda 3D-formatda ko‘rsatib turadi.
Rossiyaning o‘zida bugungi kunda bunday robotdan 20 tasi qo‘llanilmoqda, dunyo bo‘ylab esa yuzlab jarrohlik robotlari yordamidan foydalaniladi. Biroq shu paytgacha plastik operatsiya robot yordamida qilinmagan edi. Gap shundaki, da Vinci’ga aynan jarrohning qo‘l harakatlarini takrorlay oladigan maxsus “qo‘l”lar o‘rnatish orqali undan muayyan yo‘nalishdagi ishda foydalanish mumkin. Shu kungacha kardiologlar, ginekologlar va urologlar uchun shunday “qo‘l”lar yaratilgan edi, moskvalik shifokorlar esa ulardan plastik jarrohlikda qo‘llash mumkin bo‘lgan majmuani yig‘ishdi.
Yuzni yoshartirish bo‘yicha robot yordamida o‘tkazilgan operatsiya ikki yarim soat davom etdi. Mijozga ertasi kuniyoq uyiga ruxsat berildi, deyiladi xabarda.
Izoh (0)