“O‘zbekturizm” milliy kompaniyasi tomonidan 2013-yilning 20-dekabrida e’lon qilingan Qashqadaryo viloyatining sayyohlik brendini (timsolini) yaratish bo‘yicha tanlov muddati ikkinchi marta uzaytirildi. Bu haqda kompaniyasi matbuot xizmati xabar berdi.
Dastlab, ushbu tanlovga bo‘lgan qiziqish ortganligi tufayli arizalar qabuli muddati joriy yilning 24-yanvariga qadar uzaytirildi.
“Tanlovga kelib tushgan ishlar sonining ko‘pligiga qaramay, ishtirokchilarning ishlanmalari mazkur tanlov g‘oyasini to‘liq aks ettira olmaganligi sababli” tanlovga arizalar qabul qilinishi muddati joriy yilning 25-apreliga qadar uzaytirilishi hamda yutuq fondining ko‘paytirilishi haqida qaror qabul qilindi.
Tanlov g‘olibi hamda ikkinchi va uchinchi o‘rin sohiblariga avvalgi 300 ming, 200 ming va 100 ming so‘m o‘rniga endi 1 million, 700 ming va 500 ming so‘m va’da qilindi.
Tanlovning asosiy maqsadi Qashqadaryo viloyati sayyohlik brendi bo‘yicha kreativ g‘oyalar va takliflarni to‘plashdan iborat.
Mazkur erkin ijodiy tanlovda talabalar, ijodkorlar, olimlar, tarixchilar va sayyohlik hamda tarixga qiziquvchi boshqa kasb vakillari ishtirok etishlari mumkin.
Izoh (0)