Amerika maxsus xizmatlarining sobiq xodimi, OAVga elektron kuzatuv dasturlari haqidagi axborotni yetkazgan Edvard Snouden AQSh hukumatining 1,7 million maxfiy hujjatini o‘g‘irlaganligini tan olmadi. Vanity Fair jurnaliga bergan intervyusida Snouden ushbu raqamlarning bo‘rttirib yuborilganligini ta’kidladi. Bu haqda “ITAR-TASS” xabar berdi.
Avvalroq Pentagon mutaxassislari Snouden o‘g‘irlagan 1,7 million maxfiy hujjatda nafaqat maxfiy xizmat ma’lumotlari, balki AQSh harbiy kuchlarining barcha turdagi operatsiyalari joy olganligini ta’kidlagan edi.
Snoudenning so‘zlariga ko‘ra, bu ma‘lumotdagi raqamlar haddan ziyod oshirib yuborilgan. “Bunchalik ko‘p davlat sirlarini saqlashim o‘z jonimga qasd qilish bilan teng bo‘lar edi. Amerikalik mansabdorlar menda 1,7 million maxfiy hujjat yo‘q ekanligini yaxshi biladi. Ammo ular ixtiyorimdagi hujjatlarning aynan qancha ekani haqida tassavurga ega emasliklarini tan olishni istamayapti”, — deydi Snouden.
Uning aytishicha, elektron kuzatuv bilan shug‘ullanayotgan MXAning ma’lumotlar ombori shu darajada zaifki, undan istalgan maktab bitiruvchisi ham ma‘lumot o‘g‘irlay oladi.
MXAning ta’kidlashicha, Snouden hujjatlarni oshkor etishidan avval agentlikning ish uslublari qonuniy emasligi haqida rahbariyatga arz qilmagan. “MXA mening shikoyat qilganligimdan xabardor. Hattoki, shikoyatlarimdan ayrimlarini ularning elektron manziliga jo‘natganligimni ham isbotlay olaman”,— deya MXAning so‘zlarini inkor etdi Snouden.
Bundan tashqari u boshqa xorijiy davlat hukumatiga maxfiy ravishda ishlamayotganligini ta’kidladi.
Eslatib o‘tamiz, MXAning elektron kuzatuvi haqidagi maxfiy hujjatlarni OAVda oshkor etgan Snouden o‘tgan yili Rossiyada vaqtinchalik qo‘nim topgan edi. Ayni paytda AQSh prezidenti ma’muriyati ham bir necha bor Snoudenni sotqin sifatida e’lon qilib, uning sodir etgan ishi mamlakat milliy xavfsizligi uchun jiddiy zarba bo‘lganligini ta’kidladi. Aytish kerakki, Snouden AQShga qaytib kelgan taqdirda uni uzoq yillik qamoq jazosi kutib turibdi.
Izoh (0)