2014—2050-yillarda dunyoning 40 dan ortiq mamlakatida aholi soni kamayib ketadi. Bu haqda 7-aprel kuni BMTning Nyu-Yorkdagi bosh qarorgohida o‘z ishini boshlagan Aholi va rivojlanish bo‘yicha komissiyaning 47-sessiyasida BMT Bosh kotibi Pan Gi Mun o‘zining jahon demografik tendensiyalariga oid ma’ruzasida ma’lum qildi.
Anhor.uz xabar berishicha, 2014—2050-yillarda Germaniya, Xitoy, Polsha, Rossiya Federatsiyasi, Ruminiya, Serbiya, Tailand, Ukraina va Yaponiya aholisining kamayib ketish ehtimoli eng yuqoridir. Sharqiy Yevropa, Sharqiy, Janubi-Sharqiy va G‘arbiy Osiyodagi ko‘plab boshqa davlatlar aholisi uchun ham bunday xavf mavjud.
Afrika aholisi esa, aksincha ko‘payib ketishi kutilmoqda. Mutaxassislar 2050-yilgacha qit’a aholisining o‘sish sur’ati Janubiy Amerikanikidan 6 marta, Osiyonikidan 15 marta oshib ketishini ta’kidlamoqda.
Dunyo aholisi 1994-yildagi 5,7 milliarddan 2014-yilda 7,2 milliardgacha ko‘paydi. Yer aholisining yarmidan ko‘pi — 3,9 milliard kishi shaharlarda yashaydi. Pan Gi Mun shaharliklar soni o‘sishda davom etishini ma’lum qildi.
2014-yilning 1-yanvar holatiga ko‘ra, O‘zbekistonda doimiy aholi soni 30 million 488 mingdan ziyod kishini tashkil qildi va 2013-yil yanvar—dekabr oylarida 495,1 ming kishiga yoki 1,7 foizga ko‘paydi. 15,5 milliondan ortiq kishi — shahar (umumiy aholi sonining 51 foizi) va 15 millionga yaqin kishi — qishloq joylarida (49 foizi) istiqomat qiladi.
Izoh (0)