Ukrainadagi vaziyatni kuzatayotgan amerikaliklar uning qayerda joylashganini bilmasligi ma’lum bo‘ldi

Ukrainadagi vaziyatga AQShning aralashuvini ma’qullayotgan amerikaliklarning aksariyati bu mamlakat qayerda joylashganligini ham bilishmaydi. Bu haqda SSI tadqiqotlar kompaniyasi o‘tkazgan so‘rov natijalariga tayanib “ITAR-TASS” xabar bermoqda.

So‘rov 28–31-mart kunlari o‘tkazildi va unda ikki mingga yaqin amerikalik ishtirok etdi. Tadqiqot natijalariga ko‘ra, ularning oltidan bir qismigina Ukrainaning geografik joylashuvini to‘g‘ri ko‘rsatib bera olgan.

So‘rovda ishtirok etganlarning fikrlari turlicha bo‘lgan: AQSh tomonidan Ukrainada faol harakatlar olib borilishini yoqlaydigan fuqarolar Ukrainani asosan Qozog‘iston, Portugaliya, Sudan yoki Finlyandiya bilan chegaradosh joylarda, deya taxmin qilishgan. Hatto uni Braziliya bilan qo‘shni, deb hisoblaydiganlar ham bo‘lgan. Tag‘in, boshqa bir so‘rov natijalariga ko‘ra, so‘ralgan amerikaliklarning uchdan ikki qismi Ukrainadagi voqealarning borishini “diqqat bilan” kuzatib borayotganliklarini bayon etishgan.

SSI taqdim etgan ma’lumotlarga ko‘ra, so‘rovda qatnashganlar Ukrainaning geografik joylashuvi masalasida qanchalik adashgan bo‘lishsa, u yerdagi voqealarga AQShning harbiy aralashuvini shunchalik qattiq turib yoqlashgan va Rossiyaning bu boradagi harakatlarini shunchalik tahdidli, deb hisoblashgan.