Monitordagi kursorni fikr kuchi bilan harakatlantiruvchi texnologiya ishlab chiqildi

Finlyandiyaning Yuvyaskyulya universiteti olimlari ekrandagi predmetlarni faqatgina fikr kuchi bilan harakatlantira oladigan texnologiyani keng ommaga namoyish etdilar. Bu haqda “YuLYe” telekompaniyasi xabar berdi, deb yozadi “ITAR-TASS”.

Texnologiyani Yuvyaskyulya universiteti tadqiqotchisi Yarno Mikkonen shunday tushuntiradi: “Miyadagi neyronlar elektr to‘lqinlarini hosil qiladi. Inson boshiga o‘rnatilgan maxsus datchik esa bu to‘lqinlarni ushlab olib, kompyuterga yuboradi”. Shundan keyin, uning aytishicha, kompyuter o‘ziga bu signal qayerdan kelayotganligini anglab oladi, so‘ng esa ekrandagi obyektni qaysi yo‘nalishda harakatlantirish topshirilganligini aniqlaydi.

Mikkonenning ta’kidlashicha, bu jarayonda kompyuter ham, inson ham tegishli dasturdan foydalanib, birgalikda ishlashni o‘rganib olishadi.

“Ekrandagi kvadratni siljitish uchun ancha-muncha mehnat qildim, – deydi tajribada ishtirok etgan talaba Yani Ikyaxeymonen. – Bunga sarf etiladigan aqliy kuchni bemalol jismoniy mehnat bilan taqqoslash mumkin”.

Ta’kidlash kerakki, Ikyaxeymonen boshida bu tajribaga ishonmasdan, kinoya bilan qatnasha boshlagan edi. Ammo o‘zi ekrandagi kursorni qo‘zg‘ata olganini ko‘rib, hayajonga tushdi. “Bunaqasi faqat kinoda bo‘ladi, deb o‘ylagandim”, – deydi u.