Farg‘onada iqtisodiyotimizni rivojlantirishda yangi innovatsion texnologiyalarning o‘rni mavzusida ilmiy-amaliy konferensiya bo‘lib o‘tdi. Bu haqda O‘zA xabar berdi.
Viloyat hokimligi, viloyat hududiy innovatsiya faoliyati va texnologiyalar transferi markazi hamkorligida tashkil etilgan tadbirda viloyatdagi oliy o‘quv yurti professor-o‘qituvchilari, yosh olim va tadqiqotchilar, talaba-yoshlar ishtirok etdi.
2014-yilning o‘tgan davrida Farg‘ona davlat universiteti 134 million, Farg‘ona politexnika instituti 167 million, Toshkent axborot texnologiyalari universiteti Farg‘ona filiali 91,8 million so‘mlik innovatsion ishlanmalarni amalga oshirish uchun turli korxonalar bilan shartnomalar tuzgan.
Anjumanda iqtisodiyotimiz taraqqiyotiga salmoqli hissa qo‘shadigan yangi innovatsion texnologiyalar borasida turli ma’ruzalar tinglandi. Ayniqsa, magistr va talabalarning ilmiy ishlanmalari yig‘ilganlarda katta qiziqish uyg‘otdi.
– Bugungi kunda muqobil energiyadan foydalanish muhim ahamiyat kasb etmoqda, – deydi Farg‘ona davlat universiteti talabasi Ahliddin Qo‘chqorov. – Ana shularni hisobga olib, shamol va suv energetik qurilmasini yaratdim. Qurilma ekologik xavfsizligi, qulayligi va bir qator afzalliklari bilan alohida ahamiyatga ega.
Tadbir doirasida viloyatdagi oliy o‘quv yurtlarining intellektual mahsulotlari ko‘rgazmasi namoyish etildi.
Izoh (0)