AQShning BuzzFeed nashri “hamma tatib ko‘rishi lozim bo‘lgan” o‘zbek taomlari ro‘yxatini taqdim etdi. Xorij nashri milliy yeguliklarimizni “ekzotik, to‘yimli, serta’m va sog‘lom”, deya ta’rifladi.
Ro‘yxatdan lag‘mon, chuchvara sho‘rva, palov, manti, somsa, norin, sho‘rva, dimlama, kutabi (cheburek), kabob (shashlik) kabi issiq ovqatlar o‘rin oldi.
Bundan tashqari, ro‘yxatga bir qator milliy salatlar — baqlajonli salat, “Toshkent” salati, “Achchiq-chuchuk” salati kiritildi. “O‘zbek an’analariga ko‘ra, taomdan avval ishtahani ochish uchun yaxna yegulik tortiladi”, — deyiladi matnda.
Shuningdek, holvaytar, choy va shirinliklar hamda ekzotik mevalar assortisi yoki kompot ham o‘zbek milliy dasturxoniga tortiladigan doimiy shirinliklar sifatida keltirildi. “Milliy shirinliklar tanlaydigan darajada ko‘p emas”, — deya qayd etiladi maqolada. Biroq O‘zbekistonda choyning keng turi mavjudligi alohida tilga olingan va ular orasida qora, ko‘k choy, buxorocha “Choyi qaymoqiy” va o‘tli damlamalar borligi ko‘rsatilgan.
Ro‘yxatdagi taomlarning barchasiga alohida to‘xtalib o‘tilib, ta’rif-u tavsif qilingan. BuzzFeed o‘zbek xalqi taomlarni bir idishda o‘zaro bo‘lishib tanovvul qilishini ham qo‘shimcha qilgan.
Izoh (0)