Toshkentda aprelda kuzatilgan qor Janubiy Qozog‘istondan kelgan sovuq havo hisobiga sodir bo‘ldi
Aprel oyida yoqqan qor ko‘pchilikni sarosimaga solib qo‘ydi. Ob-havodagi bunday holat nima sababdan ro‘y berganini aniqlash maqsadida O‘zgidrometga murojaat qildik.
O‘zbekiston Respublikasi Gidrometeorologiya xizmat markazi rahbari Sherzod Muxtorovning “Daryo” nashriga ma’lum qilishicha, 7-aprel kuni O‘zbekiston hududiga Volgabo‘yi hududlaridan nam va nisbatan sovuq havo kirib keldi. Iliq haroratda respublika bo‘ylab 5—10 mm miqdorida yomg‘ir yog‘di.
Janubiy Qozog‘iston (Chimkent)dan kelgan sovuq havo hisobiga Toshkent viloyatidagi ba’zi tumanlarda ertalabki soat 6 va 11 oralig‘ida yomg‘irning qorga aylanishi kuzatildi.
“Aprelda qor yog‘ishi Toshkentda kamdan-kam kuzatiladi, biroq buni g‘ayriodatiy deb ham bo‘lmaydi”, — dedi Sherzod Muxtorov. Ma’lum bo‘lishicha, so‘nggi yillarda Toshkentda 2011-yilning 3-apreli va 2005-yilning 5—6-aprel kunlarida aprel qori qayd etilgan. Yomg‘irning qorga aylanishi eng kech sodir bo‘lgan yil esa 1989-yildir. O‘sha yilning 30-aprelida qor kuzatilgan.
Meteo.uz sayti bergan ma’lumotga ko‘ra, 7-aprel soat 8:00 da Toshkentda havo harorati 0,3 darajani tashkil etgan.
“Daryo” nashri taqdim etilgan ma’lumot uchun O‘zgidromet matbuot xizmatiga minnatdorchilik bildiradi.
