Sog‘lom bola yili, deb nomlangan joriy yilda qizlar uchun 100 ming donadan ziyod bejirim sport kiyimini tayyorlashga doir loyiha amalga oshirilmoqda. O‘zbekistonning barcha hududlarida yashayotgan turli yoshdagi qizlarga bayram tantanalari uchun alohida mo‘ljallangan sport kiyimlari sovg‘a sifatida beriladi. Bu haqda O‘zA xabar berdi.
Loyihani amalga oshirish uchun “Osiyo ramzi” dizaynerlar va modelyerlar uyushmasi, Toshkent to‘qimachilik va yengil sanoat instituti, “Sharq liboslari” dizaynerlik markazi hamda “O‘zbekyengilsanoat” davlat aksiyadorlik kompaniyasi mutaxassislaridan iborat maxsus ishchi guruhi tuzildi. Shuningdek, bu jarayonga “O‘zteks-Chirchiq”, “Konteks”, “Investteks”, “Gul ren teks”, “Arje feyshn” kabi mamlakatimizdagi ixtisoslashtirilgan yirik to‘qimachilik korxonalari ham jalb etildi.
“Osiyo ramzi” dizaynerlar va modelyerlar uyushmasi raisi Xolida Komilovaning aytishicha, mutaxassislar barcha yoshdagi qizlar uchun qariyb 50 turdagi sport kiyimlari modelini ishlab chiqqan. Milliy xususiyatlar, iqlim va mahalliy sharoitlar inobatga olingan holda 12 ta model ommaviy ishlab chiqarish uchun tanlab olindi. Ushbu kiyimlar tarkibiga sintetik tola qo‘shilgan matolardan tayyorlanmoqda. Bu, o‘z navbatida, ushbu liboslarning xususiyatlarini yaxshilab, shakli va zarur sanitariya-gigiyena ko‘rsatkichlarini saqlab qolishga yordam beradi.
Ayni paytda qizlar uchun mo‘ljallangan bejirim sport kiyimlarini ishlab chiqarishga tayyorgarlik ishlari nihoyasiga yetkazildi. Dizaynerlar an’anaviy naqshlar va boshqa bezak elementlaridan foydalanib, mato va rang uyg‘unligini ta’minlagan holda yangi liboslar kolleksiyasida bolalar va o‘smirlarning turmush tarzi, dunyoqarashi hamda fe’l-atvorini aks ettirishga alohida e’tibor qaratdi. Bolalar sportini rivojlantirish jamg‘armasi “O‘zteks-Chirchiq” qo‘shma korxonasi bilan ana shunday sport liboslarini ishlab chiqarish to‘g‘risida shartnoma tuzdi.
“O‘zbekyengilsanoat” davlat aksiyadorlik kompaniyasining tikuvchilik-trikotaj ishlab chiqarishni rivojlantirish boshqarmasi boshlig‘i Qahhorbek Mo‘ydinovning ta’kidlashicha, buning uchun “O‘zteks-Chirchiq” qo‘shma korxonasi tanlangani bejiz emas. Mazkur korxona yuqori texnologiyali ishlab chiqarish uskunalari, o‘zining fizika-kimyo tajriba laboratoriyasiga ega. Bu yerda libos ishlab chiqarish uchun foydalaniladigan barcha materiallar har tomonlama sifat nazoratidan o‘tkaziladi.
Ushbu korxona yaqin kunlarda mahsulotni Bolalar sportini rivojlantirish jamg‘armasiga yetkazib beradi va yangi, bejirim sport kiyimlari qizlarga sovg‘a sifatida taqdim etiladi.
Izoh (0)