Futbol bo‘yicha O‘zbekiston Olimpiya terma jamoasi 2014-yilgi Osiyo o‘yinlarida chempionlik uchun kurash olib boradi. Bu haqda O‘FF Terma jamoalar markazi direktori Asqar Tolibjonov ma’lum qildi, deya xabar bermoqda O‘FF matbuot xizmati.
Avvalroq, OAVda Qosimov 2014-yil sentabr—oktabr oylarida Janubiy Koreyaning Incheon shahrida bo‘lib o‘tadigan Osiyo o‘yinlarida ishtirok etuvchi O‘zbekiston Olimpiya terma jamoasiga bosh murabbiy bo‘lgani haqida ma’lum qilingan edi.
Asqar Tolibjonovning ta’kidlashicha, Incheondagi Osiyo o‘yinlarida 1991- va 1992-yillarda tug‘ilgan futbolchilardan iborat terma jamoa ishtirok etadi hamda jamoa oldiga chempionlik vazifasi qo‘yilgan.
“Qosimov kuzda bo‘ladigan Osiyo o‘yinlarida va 2015-yil yanvaridagi Osiyo Kubogida ishtirok etadigan terma jamoalarga ustozlik qiladi. Qosimov jamoalari Incheondagi musobaqada 20 yil avvalgi muvaffaqiyatni takrorlash va Osiyo Kubogi—2015 da muvaffaqiyatli ishtirok etishi kerak”, — deydi Tolibjonov.
Tolibjonovning qo‘shimcha qilishicha, 2014-yil yanvar oyida Ummonda bo‘lib o‘tgan U-22 Osiyo chempionatida 1991-, 1992- va 1993-yillarda tug‘ilgan futbolchilar bilan ishtirok etgan Shuhrat Maqsudov 1993-yilda tavallud topgan futbolchilardan iborat terma jamoaga ustozlik qiladi va uning oldiga navbatdagi U-22 Osiyo chempionati final bosqichiga chiqish vazifasi qo‘yilgan, deb yozadi “Kun”.
Ma’lumot uchun: Futbol bo‘yicha O‘zbekiston terma jamoasi 1994-yildan boshlab Osiyo o‘yinlarida ishtirok etib keladi. Har to‘rt yilda tashkil etiladigan o‘yinlarda o‘zbekistonlik futbolchilar bir marta – ilk ishtiroklarida (1994) g‘oliblikni qo‘lga kiritgan.
1998-yilgi Osiyo o‘yinlari chorak finalida O‘zbekiston futbolchilari Eronga 0:4 hisobida mag‘lub bo‘lgan bo‘lsa, Pusan—2002 o‘yinlarida guruhdan chiqa olmagan. Doha—2006 chorak finalida Iroqqa mag‘lub bo‘lgan O‘zbekiston termasi Xitoyning Guangchjou shahrida tashkil etilgan 2010-yilgi bahslarda yarim final ostonasida Janubiy Koreyaga mag‘lub bo‘lgan edi.
Eslatib o‘tamiz, futbol bo‘yicha O‘zbekiston milliy terma jamoasi bosh murabbiyi hisoblangan Mirjalol Qosimov “Bunyodkor” futbol klubidagi faoliyatini to‘xtatgani va endi bor e’tiborini milliy terma jamoaga qaratishi ma’lum bo‘lgan edi.
Izoh (0)