Fermerlar aprel qori mevalarni nobud qilib, sabzavotlar hosildorligini oshirishini ta’kidladi

Toshkentda yog‘gan aprel qori shov-shuv va hayrat bilan birga, qishloq xo‘jaligiga ba’zi noqulayliklarni keltirdi.

“Uz24” nashrining yozishicha, mutaxassislar ushbu holat o‘simliklarning fiziologik ahvoliga ta’sir qilishini ta’kidlamoqda.

Meva va sabzavot yetishtirish bilan shug‘ullanuvchi fermerlar esa, aksincha kechki qorning o‘ziga xos foydasi borligini aytmoqda. Ma’lum bo‘lishicha, u tuproq unumdorligiga ijobiy ta’sir qilib, don va poliz ekinlari hosildorligini oshirishi mumkin.

Sabzavotlarning dastlabki hosili aprelning so‘nggi yoki mayning birinchi o‘n kunligida kutilayotgani sababli, ularga ob-havoning keskin yomonlashuvi zarar yetkazmasligi tayin. Biroq kuchli shamol va qor gullab ulgurgan o‘rik hamda gilos daraxtlarini deyarli nobud qildi.

“Agar ob-havo tez orada yaxshilanib ketsa, salbiy oqibatlar bartaraf bo‘lishi mumkin”, — dedi bog‘bonlardan biri.