AQShdagi talabalar bazmi yuz kishining qamoqqa olinishi bilan yakunlandi
AQShning Kaliforniya shtatidagi talabalar ommaviy bazmi tartibsizlik hamda politsiyachilar va yoshlar to‘qnashuvi bilan nihoyasiga yetdi. Yuzga yaqin kishi qamoqqa olingan bo‘lib, yana 44 kishi jabrlandi, deya xabar berdi Reuters axborot agentligi.
15 mingdan ortiq kishi qatnashgan an’anaviy “Deltopiya” nomli ko‘cha bazmida nazorat qo‘ldan chiqib ketgan. Ko‘ngilxushlik mobaynida ishtirokchilardan biri spirtli ichimlik idishlariga to‘la “ryukzak” bilan politsiya xodimiga zarba bergan. Shundan so‘ng tadbirning qolgan ishtirokchilari tartib himoyachilariga tosh va mushaklar uloqtirishni boshlagan. Natijada bir necha politsiya avtomobiliga zarar yetgan.
Hukumat g‘azabga mingan olomonni tarqatish maqsadida ko‘zni yoshlantiruvchi gaz hamda o‘t o‘chirish mashinalaridan foydalangan.
Jabrlanganlarning barchasi, jumladan, besh nafar politsiya xodimi yaqin oradagi tibbiyot muassasasiga yetkazilgan. Ularning ayrimlari muassasani tark etishga ham ulgurdi. Hozirda mojaroning qolgan tafsilotlari o‘rganilmoqda.
