Ayni kunlarda Surxondaryo viloyatida chigit ekish ishlari jadal sur’atlarda olib borilmoqda. Bu yilgi ekish ishlariga qishloq xo‘jaligi xodimlaridan iborat maxsus guruhlar jalb etildi. Guruhlar zarur texnikalar bilan ta’minlangan bo‘lib, ekin maydonlariga yoqilg‘i moylash materiallari hamda urug‘lik chigit yetkazib berilmoqda. Bu haqda “Turkiston press” xabar berdi.
Sherobod tumani Surxondaryo viloyatining ekin maydoni katta hududlaridan biri hisoblanib, viloyatning qishloq xo‘jaligi rivojiga munosib ulush qo‘shadi. Tuman qishloq xo‘jaligida barcha agrotexnik tadbirlar yaxshi yo‘lga qo‘yilganligi bois pillachilik, paxtachilik, g‘allachilikda yuqori natijalar qo‘lga kiritib kelinmoqda.
— Nuriddin Murodov fermerlar uyushmasi tumandagi ilg‘or uyushmalardan biridir, — deydi fermerlar uyushmasi boshlig‘i Suyun O‘taganov. — Uyushmamizda 2 305 gektarda paxta hamda 2 073 gektarda g‘alla parvarish etiladi. 800 gektardan oshiqroq maydonlarda chigit ekish ishlari yakunlandi va qolgan maydonlar yaqin kunlarda nihoyasiga yetkaziladi.
Fermerlar uyushmasiga qarashli “Payg‘amov Po‘lat”, “Toshtemir-O‘tkir-Abbos”, “Normurodov Shavkat”, “Abdullayev Murodali Muhammedovich” va “Muhiddin-Asliddin-Bakir” kabi bir qator fermer xo‘jaliklarida ekish ishlari birinchilardan bo‘lib yakunlandi.
— Fermer xo‘jaligimizdagi mavjud g‘alla maydonlari 2 marotaba kimyoviy ozuqalar va mahalliy o‘g‘itlar bilan oziqlantirildi. Chigit ekish ishlarini esa nihoyasiga yetkazdik, — deydi “Boboqulov Raim” fermer xo‘jaligi boshlig‘i Bahodir Boboqulov. — Chigit vaqtida ekilsa mo‘l hosil garovi ekanligini yaxshi bilamiz. Shuning uchun ham mavsumda barcha birdek mas’uldir.
Izoh (0)