O‘zbekiston Respublikasi Vazirlar Mahkamasining 2014-yil 20-fevraldagi “Qashqadaryo viloyatining Shahrisabz shahrida obyektlarni qurish va rekonstruksiya qilishga doir kompleks chora-tadbirlar dasturi to‘g‘risida”gi qarori ijrosi yuzasidan qurilish ishlari boshlab yuborilgan. Bu haqda O‘zA xabar berdi.
Qarorda zamonaviy ko‘p qavatli uylar, yangi mahalla guzarlari, savdo va xizmat ko‘rsatish shoxobchalari, istirohat bog‘lari va xiyobonlar qurilishi, mavjudlarining rekonstruksiya qilinishi ko‘zda tutilgan. Jumladan, Ipak yo‘li ko‘chasidagi “Navro‘z” madaniyat va istirohat bog‘ida 2014—2016-yillarda 1 milliard so‘mlik rekonstruksiya ishlari amalga oshiriladi. Amir Temur maydonida joylashgan madaniyat va san’at saroyida rekonstruksiya ishlari joriy yil nihoyasiga yetkaziladi.
— Rekonstruksiya qilinayotgan Amir Temur xiyobonida turfa rang favvoralar, mo‘jaz ayvonchalar barpo etiladi. Jumladan, majmua atrofida shahar aholisi va sayyohlarga xizmat ko‘rsatadigan 18 yangi obyekt qurilib, mavjudlari rekonstruksiya qilinadi. — deydi viloyat arxitektura va qurilish boshqarmasi boshlig‘i Shuhrat Qurbonov. — Ipak yo‘li ko‘chasidagi “Kulollik” choyxonasi, Chorsu bozori va boshqa tarixiy yodgorliklarda qayta tiklash ishlari amalga oshiriladi.
Shaharning tarixiy-arxitekturaviy va turizm salohiyatini har tomonlama rivojlantirish maqsadida tarixiy obidalarni restavratsiya qilishga alohida e’tibor qaratilmoqda. Jumladan, “Koba” karvonsaroyi, “Chubin” madrasasi, Kunchiqar masjidi, Hovuzi Mardon, Kunduzak, “Molik Ajdar” masjidlari, “Abdushukur og‘aliq” madrasasi ta’mirlanib, hunarmandchilik markazlari tashkil etiladi.
Ayni kunlarda Sohibqiron nomi bilan yuritiladigan maydon hududi va amfiteatr atrofiga manzarali daraxt va gullar ekilmoqda. Amir Temur haykali atrofida 72 zamonaviy yoritish uskunasi o‘rnatildi. Maydon yo‘laklari va haykal poyidagi granit va marmar plitkalar almashtirildi. Yo‘laklarga 5,5 ming kvadrat metr bezakli qoplama yotqizilib, suvpurkagichlar o‘rnatish va ularni maydondagi sug‘orish tizimiga ulash ishlari nihoyasiga yetkazilmoqda.