Navoiy viloyati Navbahor tumanidagi kasb-hunar kolleji o‘qituvchisi o‘zining o‘quvchisiga haydovchilik guvohnomasini tayyorlab berish uchun pul olayotganda qo‘lga olindi. “Huquq” gazetasining xabar berishicha, o‘qituvchi guvohnoma tayyorlab berish uchun o‘quvchining onasidan 220 ming so‘m so‘ragan.
O‘zbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish (SVOJJDLQK) departamentining Navbahor tuman bo‘limi boshlig‘i Jonibek Abdukarimovning yozishicha, o‘qituvchi o‘zining yengil avtomashinasida o‘quvchisining onasidan pulni sanab olayotgan paytda huquqni muhofaza qiluvchi organlar xodimlari tomonidan qo‘lga olingan.Xabarda aytilishicha, ushbu jinoiy ishni ko‘rib chiqqan tuman sudi O‘zbekiston Respublikasi Oliy Majlisi Senatining “O‘zbekiston Respublikasi Konstitutsiyasi qabul qilinganligining yigirma bir yilligi munosabati bilan amnistiya to‘g‘risida”gi qarorining tegishli bandiga asosan o‘qituvchini jazodan ozod qilgan.