Markaziy razvedka boshqarmasining terrorchilikda gumon qilinayotgan shaxslarni saqlash va tergov qilish usullari bo‘yicha dasturlari haqida AQSh Kongressining razvedka ishlari bo‘yicha qo‘mitasi ma’ruza tayyorlagan. 3-aprel kuni Qo‘mita bu ma’ruzaning 480 sahifalik bir bo‘limini oshkor etish to‘g‘risida qaror qabul qildi. Shuningdek, senatorlar ma’ruzaning to‘liq matnini ko‘rib chiqish uchun prezident Barak Obamaga yubormoqchi, deya xabar beradi Reuters.
Avvalroq AQSh ma’muriyati sobiq prezident Kichik Jorj Bush davrida maxsus xizmatlar tomonidan yo‘l qo‘yilgan o‘z mansabini suiiste’mol qilish holatlari haqidagi hujjatning nashr etilishiga qarshi emasligini bildirgan edi. Biroq ma’ruzaga tuzatishlar kiritish va uni chop etish uchun qancha vaqt kerak bo‘lishi hozirda noma’lum.
Ma’ruzaga qiziqish yaqinda, u haqdagi maxfiy ma’lumotlar ommaviy axborot vositalariga chiqib ketishi bilan boshlandi. Amerikalik huquq himoyachilari ma’ruzaning maxfiylashtirilganligi va ko‘rib chiqish muddatining cho‘zilganligi sababli hukumatni tanqid ostiga olishdi. Xorijdan ham tanqidlar bo‘ldi, jumladan, Rossiya Tashqi ishlar vazirligining inson huquqlari bo‘yicha vakili Konstantin Dolgov ham ma’ruza oshkor etilishining cho‘zilishi Qiynoqlarga qarshi Konvensiya talablarini buzishini ta’kidlagan.
Izoh (0)