Nodavlat notijorat tashkilotlarni ro‘yxatga olishda undiriladigan boj besh baravar kamaydi

Samarqandda fuqarolik jamiyati institutlarini rivojlantirishga ko‘maklashish borasidagi qo‘shimcha chora-tadbirlarga bag‘ishlangan seminar-yig‘ilish o‘tkazildi. Bu haqda O‘zA xabar bermoqda.

– Mamlakatda nodavlat notijorat tashkilotlarni rivojlantirish, ularni tashkil etish hamda faoliyatini yo‘lga qo‘yish bilan bog‘liq tashkiliy-huquqiy mexanizmlar, tartib-taomillar soddalashtirilmoqda, – deydi viloyat adliya boshqarmasi boshlig‘ining birinchi o‘rinbosari Husan Xo‘jamqulov. — Jumladan, Prezident Islom Karimovning 2013-yil 12-dekabrdagi “Fuqarolik jamiyati institutlarini rivojlantirishga ko‘maklashish borasidagi qo‘shimcha chora-tadbirlar to‘g‘risida”gi qarori bilan 2014-yilning 1-yanvaridan nodavlat notijorat tashkilotlarni davlat ro‘yxatidan o‘tkazish uchun undiriladigan davlat boji miqdori besh barobar, ularning ramzlarini davlat ro‘yxatidan o‘tkazish uchun undiriladigan yig‘imlar miqdori 2,5 barobar kamaytirildi.

Tadbirda yuqoridagi qaror va boshqa me’yoriy-huquqiy hujjatlar bo‘yicha nodavlat notijorat tashkilotlar vakillarini qiziqtirgan savollarga mutaxassislar tomonidan javob qaytarildi.