Madridning “Real” futbol klubi Yevropa Chempionlar ligasi chorak finalida Dortmundning “Borussiya” jamoasini yirik hisobda mag‘lubiyatga uchratdi. “Kun”ning xabar berishicha, 2-aprel kuni Madriddagi “Santyago Bernabeu” stadionida bo‘lib o‘tgan o‘yin 3:0 hisobida Karlo Anchelotti shogirdlari g‘alabasi bilan yakuniga yetdi.
Uchrashuvda hisob 3-daqiqadayoq ochildi. Ushbu vaziyatda “Real”ning uelslik futbolchisi Garet Beyl qanotdan yetkazib berilgan to‘pni “Borussiya” darvozasiga to‘g‘rilab qo‘ydi.
27-daqiqaga kelib “Real” hisobdagi farqni ikkitaga oshirdi – madridliklarning ikkinchi goli Isko hisobiga yozildi. Uchinchi golga esa Krishtianu Ronaldu mualliflik qildi. U uchrashuv 57-daqiqasida Luka Modrich tomonidan aniq yetkazib berilgan pasdan so‘ng nemis jamoasi darvozaboniga hech qanday imkoniyat qoldirmadi.
Ta’kidlash joiz, ushbu uchrashuv “Real” jamoasi hujumchisi Krishtianu Ronaldu uchun Chempionlar ligasidagi 100-o‘yin bo‘ldi.
Javob o‘yini 8-aprel kuni Dortmundda bo‘lib o‘tadi. Javob o‘yinida “Real” safida Krishtianu Ronalduning maydonga tushish-tushmasligi hozircha noma’lum – dastlabki o‘yinda u jarohat olganidan keyin maydonni tark etdi.
2-aprel kuni, shuningdek, YeChL chorak final dastlabki o‘yinlari doirasida Parijda Fransiyaning “PSJ” hamda Londonning “Chelsi” jamoalari o‘rtasidagi o‘yin bo‘lib o‘tdi. Bahs maydon egalarining 3:1 hisobidagi g‘alabasi bilan yakuniga yetdi.
Ushbu o‘yinda ham hisob dastlabki daqiqalarda ochildi – “PSJ” hujumchisi Isakel Lavessi 4-daqiqadayoq “Chelsi” darvozasini aniq nishonga oldi. Uchrashuv 27-daqiqasida “Chelsi” hujumchisi Eden Azar penaltidan hisobni tenglashtirdi, biroq ikkinchi bo‘limda “PSJ” g‘alabani ilib ketdi.
Dastlab, 61-daqiqada “Chelsi” himoyachisi David Luiz o‘z darvozasini nishonga olib qo‘yib, “PSJ”ni hisobda oldinga olib chiqqan bo‘lsa, o‘yin yakunlanishi arafasida maydon egalarining argentinalik futbolchilaridan biri Xaver Pastore ikki uchrashuvdan iborat bosqichda muhim ahamiyat kasb etishi mumkin bo‘lgan gol muallifiga aylandi.
Endi Loran Blan shogirdlari 8-aprel kuni Londondagi “Stemford Bridj” stadionida “Chelsi” mehmoni bo‘ladi. Ikki o‘yin natijasiga ko‘ra g‘oliblikni qo‘lga kiritgan jamoa yarim finalga yo‘l oladi.
Eslatib o‘tamiz, 1-aprel kuni YeChL chorak finali doirasida dastlabki ikkita juftlik o‘yinlari o‘tkazilgan edi. “Barselona” – “Atletiko Madrid” va “Manchester Yunayted” – “Bavariya” o‘yinlari bir xil —1:1 hisobidagi durang natija bilan yakuniga yetgan.
Izoh (0)