Janubiy Koreyada topilgan 2 ta uchuvchisiz samolyot Shimoliy Koreyada ishlab chiqarilgani hamda josuslik maqsadida qo‘llanilgani ma’lum bo‘ldi. Bu haqda 2-aprel kuni Renxap agentligi xabar berdi.
Uchuvchisiz samolyotlar hududning holatini tasvirga olishda Yaponiyada ishlab chiqarilgan kameralardan foydalangan, qurilmaning qolgan barcha qismlari Xitoyda tayyorlangan. Shuni qayd etish lozimki, qurilmalar baza bilan to‘g‘ridan-to‘g‘ri aloqa qilmagan, tasvirga olingan suratlarni bevosita uzatish imkoniyati bo‘lmagan. Kameralarning xotirasida harbiy bazalar va Prezidentning Seuldagi qarorgohi aks etgan fotolavhalar topilgan. Apparatlarning navigatsiyasi uchun GPS tizimidan foydalanilgan.
G‘arbda takomillashgan boshqa nusxalariga qaraganda Shimoliy Koreyaning uchuvchisiz samolyotlari joyning landshaftiga qarab o‘z balandligini o‘zgartirish qobiliyatiga ega bo‘lmagan. Shunga qaramasdan Janubiy Koreya radarlari qurilmalardan faqat birini sezishga muvaffaq bo‘ldi. Ikkinchi qurilma esa halokatga uchraganidan keyingina topilgan.
Boshqa ma’lumotlarga ko‘ra, birinchi qurilmaning qoldiqlari 24-mart kuni KXDR bilan chegaradan uncha uzoq bo‘lmagan masofada, ikkinchi qurilmaning qismlari esa 1-aprelda topilgan. Parvozning so‘nggi vaqtida qurilmalar Janubiy Koreyaning Pennindo orolida halokatga uchragan.
Ta’kidlash joiz, Pxenyan o‘sha kuni ertalab orol yaqinida harbiy mashg‘ulotlar o‘tkazgan. 31-mart kuni Janubiy va Shimoliy Koreya o‘rtasida dengizda o‘zaro qurolli otishmalar sodir etilgan edi. Seul hukumati shimolliklarning bu harakatlarini atayin uyushtirilgan fitna sifatida baholadi.
Seul va Pxenyan 1950—1953-yillardagi qurolli nizolar sodir bo‘lganidan buyon haligacha tinchlik shartnomasini imzolagani yo‘q. Ikkala davlat urush holatida hisoblanib, munosabatlarning keskinligi saqlanib qolmoqda hamda ajratib olinmagan chegaralarda vaqti-vaqti bilan harbiy mojarolar takrorlanib turibdi. Masalan, Shimoliy Koreyaning 2010-yilda Janubiy Koreya hududini o‘qqa tutish natijasida 4 kishi halok bo‘lgan edi.
Izoh (0)