Ukraina Milliy banki (UMB) tomonidan o‘rnatilgan grivnaning rasmiy kursi dollarga nisbatan olganda 14 kopeykaga, 11,24 grivnagacha pasayishi kuzatildi, deya xabar beradi bankning rasmiy sayti.
Shu tarzda grivna-dollar kurslari nisbatida tarixiy pasayish qayd etildi. Ta’kidlash joiz, bundan oldingi rekord 1-aprel kuni o‘rnatilgan edi.
UMBning yevro bo‘yicha kursi 15,5 grivnaga yetganligi ham kutilmagan holat hisoblanadi. Oxirgi 2 hafta mobaynida yevro 1,8 grivnaga qimmatlashdi. Shuningdek, Rossiya rublida ham qimmatlashish kuzatildi. Bank endilikda 10 rubl uchun 3,19 grivna nisbatini qayd etmoqda.
Banklararo valyuta bozorida dollar 11,5 grivnaga ko‘tarildi. Bu esa o‘tgan kun holatiga ko‘ra 8 kopeyka ko‘proq deganidir.
Avvalroq UMB raisi Stepan Kubiv grivna kursini ushlab turish uchungina banklararo valyuta bozoriga shiddat bilan kirib bormoqchi emasligini aytib o‘tgan edi. Uning so‘zlariga ko‘ra, ayni vaqtda Ukraina valyutasi “tabiiy o‘zgarishlar jarayoni’’ga yaqin tartibda turibdi.
Yil boshida 1 dollarga 8 grivna miqdorida hisoblangan grivna kursi so‘nggi oylarda sezilarli darajada pasaydi. Bunga asosiy sabab sifatida Ukrainada sodir bo‘lgan siyosiy inqiroz hamda mamlakat xalqaro zaxirasining jadal sur’atlarda, 20 milliard dollardan 15 millardga qisqarishini keltirish mumkin.
Izoh (0)