Majruh qo‘l panjasidagi og‘riqdan 16 yil davomida azob chekib kelgan angliyalik oxiri uni mustaqil tarzda kesib tashladi. Bungacha u bir necha bor shuni so‘rab tibbiyot xodimlariga murojaat etgan, ammo shifokorlar bemorning qo‘lini kesishga rozi bo‘lmagan edilar. Bu to‘g‘rida Metro UK nashri ma’lumotiga tayanib MedPortal.ru sayti xabar bermoqda.
Devon grafligida yashovchi 44 yoshli sobiq mexanik Mark Goddard mototsiklda halokatga uchragach, chap qo‘li mayib bo‘lib qolgan va doim bundan aziyat chekib kelgan. Shifokorlar qo‘llagan muolajalar aytarli naf bermagach, u panjasini kesishlarini iltimos qilgan. Ammo rad javobini olavergach, buni o‘zi amalga oshirishga qaror qildi.
Buning uchun Goddard o‘z uyining orqa hovlisida bolta, zanjir va eski to‘sindan qo‘lni chopish uchun moslama yasadi. Biroq qo‘lbola moslama uning bilagini butunlay chopib tashlay olmadi. Shunda Mark boshlagan ishini pichoq yordamida oxiriga yetkazdi. Keyin esa, shifokorlar xabar topishsa qaytadan tikib qo‘yishlaridan cho‘chib, kesib tashlangan qo‘l panjasini yondirib yubordi.
Goddard bu jarayonda bir litrdan ko‘proq qon yo‘qotgan edi, shuning uchun uni zudlik bilan shifoxonaga yotqizishdi.
“Agar shu dahshatli og‘riqni kasalxona sharoitlarida bartaraf etishning iloji bo‘lganida edi, men bu qaltis ishga qo‘l urmagan bo‘lar edim, – deydi sobiq mexanik. – Biroq bu yagona chora bo‘lib chiqdi. Umid qilamanki, endi o‘zim va oila a’zolarimiz xotirjam yashay olamiz”.
Lekin panjasini kesib tashlagani bilan, u qo‘lining qolgan qismidagi og‘riqdan qutula olmadi. Goddard shifokorlarga ultimatum qo‘ygan: agar shifoxonada bu og‘riqlarni to‘xtata olishmasa, u qo‘lini endi tirsagidan chopib tashlamoqchi!
O‘zining aytishicha, Mark bir necha marta psixiatr testlaridan o‘tgan va aqli joyida, deya e’tirof etilgan.
Izoh (0)