Toshkent metrosi vagonlariga kuzatuv kameralarini o‘rnatish boshlandi
Toshkent metropoliteni vagonlariga kuzatuv kameralarini o‘rnatish boshlandi. Bu boradagi ishlar 2014-yil martida boshlangan, deb xabar bermoqda “Kun”.
Xususan, 2-aprel kuni metropolitenning “Yunusobod” yo‘nalishida harakatlanayotgan 8956, 8323, 8324 va 8957 sonli vagonlardan tashkil topgan harakatlanuvchi tarkib kuzatuv kameralari bilan ta’minlangan. Har bir vagonga o‘rnatilgan kamida uchtadan kamera butun vagon ichi va undagi yo‘lovchilar xulqini kuzatish imkonini beradi.
Toshkent metropoliteni rahbariyati vagonlar ichiga kuzatuv kameralarini o‘rnatishni rejalashtirayotganini 2012-yil iyun oyida ma’lum qilgan. Bu metropolitenda xavfsizlikni ta’minlash doirasidagi choralardan biridir. Bosqichma-bosqich metroning barcha vagonlari kuzatuv videokameralari bilan ta’minlanadi.
Ta’kidlash joiz, 2012-yilda Toshkent metropolitenining barcha bekatlari kuzatuv kameralari bilan to‘liq ta’minlangan edi.
Ma’lumot uchun: Xavfsizlikni ta’minlash maqsadida vagon ichiga kuzatuv kameralarini o‘rnatish bo‘yicha Toshkent Nyu-Yorkdan tortib Moskvaga qadar — jahon metropolitenlari tajribasidan o‘rnak oldi.
