O‘tgan savdo haftaligi (24—28-mart) sezilarli darajada eksport hajmining o‘sishi bilan yakunlandi. Xususan, “O‘zRTXB” OAJ valyuta savdo maydonchasining eksport hajmi 5,9 million dollarni tashkil etdi, bu esa oldingi hafta ko‘rsatkichiga nisbatan 6 marotabaga ko‘pdir. Bundan tashqari, valyuta savdo maydonchasida qayd etilgan ushbu haftalik hajm joriy yil uchun maksimal ko‘rsatkich hisoblanadi.
O‘zbekiston Respublikasi Tovar xomashyo birjasi matbuot xizmatining xabar berishicha, ko‘rsatilgan davr mobaynida 13 xorijiy kompaniyalar birjaning eksport savdolarida ishtirok etib, neft mahsulotlari, suyultirilgan gaz, polietilen, sement va mineral o‘g‘itlarni sotib oldilar.
Xaridorlar tomonidan bildirilgan talabning asosiy qismi Farg‘ona NQZ mahsulotlariga to‘g‘ri kelmoqda. Sotilgan ushbu mahsulotlarning umumiy hajmi 4 million AQSh dollari yoki eksportning 70 foizini tashkil etdi. Kuzatilayotgan savdo haftaligida FNQZ 6 ming tonna sanoat moylari va 600 tonna neft gachini sotishga muvaffaq bo‘ldi.
Suyultirilgan gazning eksport bozori ham alohida e’tiborga loyiq. Uning sotilish hajmi oldingi haftaga nisbatan uch marotabaga ko‘tarilib, 1 million AQSh dollarini tashkil etdi. Suyultirilgan gazning savdolarga chiqarilgan butun hajmi “Sho‘rtan Gaz Mahsulot” MChJ QK tomonidan qo‘yilgan.
Shuningdek, sezilarli darajadagi o‘sish polietilen bozorida ham kuzatilgan va uning savdo hajmi 450 tonnani tashkil etgan. Uning eksport tarkibiy tuzilmasidagi ulushi 11 foizni tashkil etdi.
Izoh (0)