Aloqa, axborotlashtirish va telekommunikatsiya texnologiyalari davlat qo‘mitasida Yagona interaktiv davlat xizmatlari portali faoliyati – davlat organlari tomonidan aholi murojaatlariga munosabat holati, joriy qilinayotgan interaktiv xizmatlar tahlili, mavjud kamchiliklarni bartaraf qilish borasidagi chora-tadbirlarga bag‘ishlangan muhokama tashkil etildi. Muhokamada bir qator vazirlik va davlat organlari mas’ul rahbarlari va mutaxassislari ishtirok etdilar. Bu haqda qo‘mita matbuot markazi xabar berdi.
Tadbirda Yagona portal faoliyati har tomonlama, xususan tanqidiy o‘rganib chiqildi. Xususan, fuqarolar tomonidan Yagona portal orqali vazirlik va davlat idoralariga yuborilayotgan aholi murojaatalariga o‘z vaqtida munosabat bildirmaslik holatlari tahlil qilinib, tegishli davlat organlariga bu bo‘yicha tezkor chora-tadbirlarni amalga oshirish bo‘yicha tavsiyalar berildi.
Shuningdek, davlat va xo‘jalik boshqaruvi organlari tomonidan fuqarolar murojaatlariga nisbatan bildirilayotgan munosabat – javob xatlarining sifatiga ham to‘xtalib o‘tilib, Yagona portal orqali kelib tushgan fuqaro murojaatlariga nisbatan ba’zi bir davlat idoralari tomonidan taqdim etilayotgan aksariyat ma’lumotlar aholi tomonidan qoniqarsiz, deb hisoblanayotgani ta’kidlandi.
Davlat va xo‘jalik boshqaruvi organlariga mazkur masalalarni o‘z vaqtida bartaraf etish, Yagona portal orqali kelib tushayotgan aholi murojaatalariga o‘z vaqtida va yuqori darajada munosabat bildirish bo‘yicha chora-tadbirlarni qabul qilish yuzasidan tavsiyalar berildi.
Yig‘ilish doirasida tadbirkorlik subyektlariga ko‘rsatilayotgan xizmatlar sifati va sonini yanada oshirish masalalari ham alohida o‘rganib chiqildi.
Vazirlik va davlat idoralari vakillari tomonidan aholi va tadbirkorlik subyektlariga ko‘rsatilayotgan elektron xizmatlar, Yagona portal orqali taqdim qilinayotgan interaktiv xizmatlar, murojaatlarni ko‘rib chiqish holati, boshqaruvda AKTni joriy qilish bo‘yicha tahliliy ma’lumotlar, qarashlar va mulohazalar, yangi loyihalar va joriy qilinishi rejalashtirilgan xizmatlar xususidagi taqdimotlari bilan chiqish qildilar.
Yig‘ilish yakuni bo‘yicha Davlat aloqa qo‘mitasi tomonidan Yagona portal orqali kelib tushgan murojaatlarni vazirlik va idoralarning haftalik yig‘ilishlarida tanqidiy ko‘rib chiqilishi tavsiya etildi hamda 2014-yilning ikkinchi choragida aholi va tadbirkorlik subyektlari uchun joriy qilinishi ko‘zda tutilgan interaktiv davlat xizmatlarining aniq ro‘yxatini belgilash va ishlarni hamkorlikda tashkil etish kelishib olindi.
Izoh (0)