Velosport bo‘yicha xalqaro musobaqalar g’olibi va bir necha bor O‘zbekiston chempioni Vladimir To‘ychiyev Xalqaro Gonkong Kubogida jamoaviy velotrek poygasida ochkolar (elit toifa) bo‘yicha uchinchi o‘rinni egalladi. Bu haqda velosport federatsiyasi matbuot xizmati ma’lumotlari asosida “Gazeta.uz” xabar berdi.
10—12 yanvar kunlari bo‘lib o‘tgan turnirda velosport bo‘yicha O‘zbekiston milliy terma jamoasi tarkibida Vladimir To‘ychiyev, Dmitriy Lozovoy, Timur Gumerov, Alla Bezuglova va Yekaterina Knebeleva ishtirok etdi.
Xalqaro velosipedchilar uyushmasi (UCI) tasnifi bo’yicha Gonkong Kubogi Class 1 kategoriyasiga muvofiq keladi. Bu esa sportchilarga yuqori ballarni qo‘lga kiritish va milliy terma jamoada hamda shaxsiy reytingini oshirish imkonini beradi.
Musobaqada 10 dan ortiq jamoalar ishtirok etdi. O‘zbekiston sportchilari skretch, omnium va ochkolar bo‘yicha guruh poygalarida bahs olib bordi.
Izoh (0)