Тошкент вилоятининг Ўрта Чирчиқ туманидаги хонадонда юз берган портлаш оқибатида бир оиланинг 4 нафар аъзоси вафот этди. Бу ҳақда “Ishonch.uz” хабар берди.

Маълум қилинишича, воқеа 16 апрель куни “Ўрта Овул” МФЙдаги хонадонда рўй берган. Дастлабки маълумотларга кўра, 1996 йилда туғилган эркак ва унинг уч нафар фарзанди портлашдан сўнг келиб чиққан ёнғинда ҳалок бўлган. Унинг турмуш ўртоғи ҳамда онаси оғир аҳволда шифохонада қолмоқда.

Қўшниларнинг айтишича, воқеа содир бўлган пайтда эркак яқинларини қутқаришга уринган. У аёли ва онасини деразадан ташқари чиқариб юборишга улгурган, аммо болаларини қутқаришга ҳаракат қилган пайтда ўзи ҳам ҳалок бўлган.

Ҳозирча ҳолат юзасидан расмий маълумот берилмади.

2026-йилнинг фервалида Қўқондаги кўп қаватли уйда газ портлаганди. Ҳодиса оқибатида бир нечта хонадонларга зарар етган, 4 нафар фуқаро турли даражада куйиш тан жароҳати олиб улардан бири шифохонада вафот этганди. Мутахассислар томонидан ўрганиш жараёнида ушбу чақнаш содир бўлган хонадонда уй эгаси газ плитасидан фойдаланган пайтда носоз ва ностандарт шлангдан фойдаланган ва бу охир-оқибат ўша катта фожиага сабаб бўлган.