Мьянмада 4300 дан ортиқ маҳбус, жумладан, тахтдан ағдарилган собиқ президент ҳам афв этилди. Бу ҳақда Al Jazeera хабар берди.

Қарор хунта етакчиси Мин Аунг Ҳлайн томонидан қабул қилинган. Бу унинг апрель ойида президентлик лавозимини эгаллаганидан бери амалга оширган илк расмий чораларидан биридир. Афв этилганлар қаторида 2021-йилги тўнтаришдан бери ҳибсда бўлган собиқ президент Вин Мйинт ҳам бор.

“Мин Аунг Ҳлаинг 4335 нафар маҳбусни афв этишни маъқуллади”, деб хабар берди Мьянманинг МРТВ давлат телеканали.

Маҳбусларнинг бир қисми тўлиқ озод этилган, бошқаларининг эса жазоси енгиллаштирилган. Ҳозирда 80 ёшли собиқ етакчи Аунг Сан Суу Кйи ҳам 27 йиллик қамоқ жазосини ўтамоқда. Унинг адвокати “Reuters” агентлигига жазо муддати олтидан бир қисмга қисқартирилганини айтди. Бироқ собиқ президентга жазонинг қолган қисмини уй қамоғида ўташга рухсат бериладими ёки йўқми номаълум.

Мин Аунг Ҳлайн тўнтаришдан сўнг Суу Кйини ҳибсга олган эди. Амнистиялар одатда Мьянмада январь ойидаги Мустақиллик куни ва апрель ойидаги янги йил байрами муносабати билан эълон қилинади.

Озод этиладиганлар орасида 179 нафар хорижийлик ҳам бор, улар депортация қилинади. Амнистия барча ўлим жазоларини умрбод озодликдан маҳрум қилишга алмаштириш, умрбод жазони 40 йилгача қисқартиришни назарда тутади. Бошқа барча маҳбусларнинг жазо муддати эса олтидан бир қисмга камайтирилади. Яъни маҳбуснинг умумий қамоқ муддати 6 га бўлиниб, унинг 1 қисми олиб ташланади.