Эрон Ислом инқилоби қўриқчилари корпуси (ИИҚК) 27 март куни Ҳормуз бўғози ёпилганини ва бу сув йўли орқали амалга ошириладиган ҳар қандай транзит учун кескин чоралар кўрилишини маълум қилди. Бу ҳақда Al Arabiya хабар берди.


ИИҚК баёнотига кўра, Ҳормуз бўғози душман портларига бораётган ёки у ердан келаётган кемалар ҳаракати учун бутунлай ёпилган. Ҳарбий тузилма вакиллари аллақачон стратегик нуқтадан ўтишга ҳаракат қилган учта кемани ортига қайтариб юборганини билдирди.


“Бугун эрталаб турли миллатларга тегишли учта контейнер кемаси ИИҚК ҳарбий-денгиз кучлари огоҳлантиришидан сўнг ортига қайтарилди”, дейилади корпуснинг расмий Sepah News сайтида эълон қилинган хабарда.


Эрон томонининг даъво қилишича, мазкур кемалар АҚШ президентининг Ҳормуз бўғози очиқлиги ҳақидаги “ёлғон” баёнотларига ишониб, ҳудуддан ўтишга уринган.
Эътиборлиси шундаки, Эрон ташқи ишлар вазири Аббос Арақчи дўст давлатларнинг кемалари учун бўғоз очилганини маълум қилганди.
Ҳормуз бўғози жаҳон нефть савдоси учун энг муҳим стратегик йўлаклардан бири ҳисобланади ва у орқали дунё бўйлаб истеъмол қилинадиган хом ашёнинг деярли 20 фоизи ташилади. Мазкур сув йўли АҚШ ва Исроилнинг Эронга қарши олиб бораётган уруши сабаб деярли ёпиб қўйилган.