Қозоғистоннинг янги Конституция лойиҳасида рус тилидан фойдаланишга оид формулировка ўзгартирилди. Бу ҳақда Конституциявий суд раиси Бакит Нурмуҳамовга таяниб, “РИА Новости” маълум қилди.

31 январь куни конституциявий ислоҳотлар бўйича комиссия Қозоғистоннинг янги Конституцияси лойиҳасини эълон қилган эди. Лойиҳанинг 9-моддасида давлат ташкилотлари ва маҳаллий ўзини ўзи бошқариш органларида қозоқ тили билан тенг равишда рус тилидан ҳам расмий фойдаланилиши қайд этилганди. Эндиликда ушбу моддада ишлатилган “тенг” сўзи “қаторида” сўзига алмаштирилади. Яъни рус тили қозоқ тили билан тенг мақомда эмас, балки “қозоқ тили қаторида” қўлланади.

“Янги Конституциянинг 9-моддасида ‘тенғ сўзи ‘қаторида’ сўзи билан алмаштирилди”, деди Нурмуҳамов конституциявий комиссиянинг ўнинчи йиғилишида.

​

Унинг таъкидлашича, ҳукумат, парламент, президент администрацияси мутахассислари, тилшунослар ва бошқа экспертлар Конституция лойиҳасига терминологик ҳамда маъновий бир хилликни таъминлаш мақсадида таҳририй ва услубий ўзгартиришлар киритган.

Қозоғистон президенти Қосим-Жўмарт Тўқаев 21 январь куни конституциявий ислоҳотлар бўйича комиссия тузиш тўғрисидаги фармонни имзолаган. Комиссия мунтазам йиғилишлар ўтказиб, парламент ислоҳоти бўйича таклифларни таҳлил қилмоқда ҳамда Конституцияга ўзгартиришлар тайёрламоқда.

Иш жараёнида комиссия аъзолари Асосий қонунга киритиладиган таклифларни батафсил кўриб чиқди. Ушбу ўзгартиришлар Конституциянинг барча бўлимлари ва 77 моддани қамраб олиб, ҳужжат матнининг 84 фоизини ташкил этади.