Туркманистоннинг Болқон вилоятида Мамметкўл ва Делили сув омборлари бутунлай қуриб қолди. Бу ҳақда “Метеожурнал” хабар берди.

Бунга 2024/2025-йилларнинг совуқ мавсумида ёғингарчилик камлиги туфайли юзага келган узоқ муддатли қурғоқчилик ва Этрек дарёсидан сув келишининг тўхташи сабаб бўлган.

2024 йил ноябрь ойида Мамметкўл сув омборининг умумий сув сатҳи 3,26 квадрат километрни, Делилиники эса 0,2 квадрат километрни ташкил этган. 2025 йил март ойига келиб, Мамметкўл майдони 2,5 квадрат километргача қисқарди. Делили эса деярли қуриб, 0,08 квадрат километрга тушиб қолди.

Май ойида Мамметкўл майдони 0,65 квадрат километргача қисқарди ва Делили бутунлай қуриди. Июнь бошига келиб Мамметкўл ҳам тўлиқ қуриб қолди. Бу омбор охирги марта 2021 йил октябрь ойида қуриб, 2023 йил августигача сувсиз қолган, кейин кучли тошқин туфайли қайта тўлган эди.

Мамметкўл сув омбори 1964-йилда ишга туширилган бўлиб, унинг умумий сиғими 20,5 миллион куб метр, фойдали ҳажми эса 17,9 миллион куб метрни ташкил этади. Делили эса 1970-йилда фойдаланишга топширилган, унинг умумий ва фойдали ҳажми 5,32 миллион куб метрга тенг.

Этрек метеостансияси маълумотларига кўра, 2025-йилнинг фақат февраль ва март ойларида ёғингарчилик меъёрида бўлган, қолган ойларда уларнинг миқдори меъёрдан сезиларли даражада паст бўлган. Январь ойида атиги 1,6 мм, май ойида эса 1,4 мм ёмғир ёғган. Июнь-август ойларида ёмғир ёғмади, куз ҳам қуруқ келди.

2025-йилнинг биринчи ярмида ёғингарчилик камайиши туфайли Амударё ҳавзасига кирмайдиган сув ҳавзалари ва дарёларда гидрологик қурғоқчилик кучайди. Бу эса Мурғоб ва Тажан сув омборларида сув ҳажмининг кескин камайишига олиб келди.

Суви кам Атрек дарёси билан тўйинадиган сунъий сув ҳавзалари эса тўлиқ қуриб қолди. Куз фаслига келиб Амударё ҳавзасидаги сув омборларида ҳам сув таъминоти билан боғлиқ вазият ёмонлашган.