Андижонлик блогернинг шикояти суд томонидан қаноатлантирилмади

Андижон вилояти маъмурий судининг кассация инстанцияси Facebook‘да «Отабек Нуритдинов» тахаллуси остида воқеа-ҳодисаларга ўз муносабатини билдириб борган фуқаро Абдуфатто Нуритдиновнинг шикоятини рад этди. Бу ҳақда Олий суд матбуот хизмати раҳбари Азиз Обидов «Дарё»га маълум қилди.

Фото: «Sof.uz»

4 январь куни Андижон вилоят маъмурий суди кассация инстанциясининг очиқ суд мажлисида Абдуфатто Нуритдинов томонидан Андижон вилоят маъмурий судининг 30 декабрдаги қарори устидан кассация тартибида келтирган шикояти маъмурий иш ҳужжатлари асосида Андижон вилоят маъмурий суди судьяси Д. Халилов раислигида кўриб чиқилди кўриб чиқилди. Хабар беришларича, суд мажлисида Абдуфатто Нуритдинов иштирокида жабрланувчилар ва гувоҳлар сўроқ қилинган. Ҳуқуқбузарнинг кўрсатмалари ва ҳимоячисининг музокара сўзлари тингланган. «Суд ушбу маъмурий иш материалларини ҳар томонлама ва тўлиқ ўрганган ҳолда, Абдуфатто Нуритдиновнинг кассация тартибида берилган шикоятини рад қилиб, қаноатлантирилмасдан қолдириш ва Андижон вилоят маъмурий суди томонидан 30 декабрдаги унга нисбатан чиқарилган қарорни ўзгаришсиз қолдириш ҳақида қарор қабул қилинганлиги маълум қилинади», — дейилади Олий суд ахборотида. Аввалроқ, 30 декабрь куни Андижон вилоят маъмурий судининг очиқ суд мажлисида Асака туман ИИБ томонидан фуқаро Абдуфатто Нуритдинов (блогер Отабек Нуритдинов)га оид Маъмурий жавобгарлик тўғрисидаги кодекснинг 40-моддаси (туҳмат), 41-моддаси (ҳақорат) ва 183-моддаси (майда безорилик) билан юритилган маъмурий иш кўриб чиқилгани ҳақида хабар берилган эди. Суд қарорига кўра, Абдуфатто Нуритдинов Маъмурий жавобгарлик тўғрисидаги кодексининг 40-моддаси, 41-моддаси ва 183-моддасида назарда тутилган ҳуқуқбузарликларни содир этганликда айбли деб топилиб, унга Маъмурий жавобгарлик тўғрисидаги кодекснинг 34-моддаси тартибида узил-кесил ўташ учун 15 сутка маъмурий қамоқ жазоси тайинланган эди.