Ўзбекистон темир йўллари бошқармаси делегацияси Кобулга ташриф буюриб, Афғонистон темир йўллари департаменти раҳбарияти билан учрашди.
Томонлар учрашувда темирйўл соҳасидаги ҳамкорликни ривожлантиришни муҳокама қилган. Ўзбекистон томонидан делегацияга “Ўзбекистoн темир йўллари” акциядорлик жамиятининг бошқарув раиси биринчи ўринбосари Хикматулла Рахметов бошчилик қилган. У Ўзбекистон темирйўл орқали ташишни ошириш мақсадида темирйўл тарифини 50 фоизга пасайтирмоқчи эканини айтган.
Таъкидланишича, мева-сабзавотларни ортиш ва тушириш мақсадида Ҳайратон—Мозори Шариф йўналишидаги Наибобод бекатида омборхона қурилади. У Афғонистондан мева-сабзавотларни Марказий Осиё, Европа ва хорижий мамлакатларга кечиктирмасдан ва зарар етказмасдан етказиб берилишини таъминлайди.
Эслатиб ўтамиз, февраль ойида Афғонистон миллий темирйўл бошқармаси бошлиғи мулла Бахт ул Раҳмон Шарофат Ўзбекистонга ташриф буюрганди.
27 декабрь куни Ўзбекистон транспорт вазири Илҳом Маҳкамов Афғонистон транспорт ва фуқаро авиацияси вазири вазифасини бажарувчи Ҳамидулло Охунзода бошчилигидаги делегация вакиллари билан учрашув ўтказганди. Томонлар транспорт ва логистика соҳасидаги ҳамкорлик алоқаларини ривожлантириш мақсадида қатор масалаларни муҳокама қилган. Хусусан:
- автомобиль ташувларида ундириладиган йиғим ва тўловларни паритет асосида ундирилишини таъминлаш;
- Афғонистон ҳудуди орқали транзит ҳамда икки томонлама ташувларни ривожлантириш;
- темирйўл ташувларидаги тариф ставкаларига имтиёзлар тақдим этиш.
Шунингдек, томонлар Ўзбекистон—Афғонистон—Покистон темирйўл қурилиши лойиҳасини жадаллаштириш билан боғлиқ масалаларни муҳокама қилганди.
Изоҳ (0)