Ижтимоий тармоқларда Сурхондарё вилояти ЙПХ ходимларининг ўзаро жанжаллашган ҳолатлари акс этган видео тарқалган эди. Видеода кўринишича, ЙПХБ командирининг хизмат бўйича ўринбосари майор Бахтиёр Избосаров ва 1-сафарбарлик гуруҳи инспектори сафдор Жалол Абдураҳмонов билан ўзаро тортишиб кетган.
Майор Бахтиёр Избосаров: Кеча сизга ҳам айтдим-а, онасини эмсин, махсус гуруҳ ҳам ишламади. Мен биринчи гуруҳга зорини қиляпман, на бир чорраҳани тутади, на бир “децкий болница”, на бир бошқа-бошқа. Майли, инобатга олиб қўйяпман, гапиряпман қўйяпман, индамай, эшитиб-кўриб юрибман. Мен ҳам жинни эмасман. Кеча эътирозимни билдирдим Абдураҳмонов Жалол деган бола тўғрисида. 6 та Damas’ни кўриб ўтирибди, силжиш йўқ. Охири ўзингиз ҳам мени кўриб гапирвордингиз-а? Илтимос, асабимни ўйнамангларей!
Сафдор Жалол Абдураҳмонов: Нима қиламиз битта “ГАИ”?
Майор Бахтиёр Избосаров: (Сўкиниб) нима бидирлайсан, нима бидирлайсан?
Сафдор Жалол Абдураҳмонов: Нима қилайлик? Нима деяпман?
Шундан сўнг майор Бахтиёр Избосаров сафдор Жалол Абдураҳмоновга сўкиниб гапира бошлайди, у эса сўкинмаслигини сўрайди. Бахтиёр Избосаров келиб, Жалол Абдураҳмоновни елкаси билан итариб юборади. У ерда ҳозир бўлган бошқа ходимларни уларни ажратиб қўяди.
Майор унга гап қайтарган сафдордан “значок” ва гувоҳномасини беришини сўрайди. Сафдор ходим эса уни погонини юлгани учун майор жавоб беришини айтади.
Видео давомида майор Бахтиёр Избосаров шахсий таркибга қонунбузарликларни аниқлаш бўйича режа топширган аудиоси қайд этилган
Бир инспектор ўша 135 (йўл ҳаракати қоидаларида назарда тутилган ҳужжатлари бўлмаган шахсларнинг транспорт воситаларини бошқариши) ва бошқа қоидабузарликлар бўйича учтадан зиёд бўлиши керак. Учтадан кам бўлиши керак эмас, қарздорлик бўйича ҳам худди шундай. Энг камида 3 та бўлиши керак, ундан кам бўлиши керак эмас. Ундан зиёдини қилсаларинг, ўзларинг учун қилаверинглар, фақат 3 тадан кам бўлмаслиги керак
Шуни ҳисобига инспектор бир кун давомида 6 та транспорт воситасини жарима майдончасига киритиши керак, энг камида, дейди майор Бахтиёр Избосаров.
Мазкур ҳолат юзасидан Сурхондарё вилояти ИИБ ЖХХ ЙҲХБ ахборот хизмати изоҳ берди. Айтилишича, воқеа бир йил аввал, яъни 2023 йилнинг 29 август куни содир бўлган.
Сурхондарё вилояти ИИБ ЖХХ ЙҲХБ саф майдонида ЙПХ ходимлари билан ўтказилган хизматолди йўриқномаси вақтида ЙПХБ командирининг хизмат бўйича ўринбосари майор Бахтиёр Избосаровнинг 1-сафарбарлик гуруҳи инспектори сафдор Жалол Абдураҳмонов билан ўзаро тортишувли ҳолати юзасидан вилоят ИИБ масъуллари томонидан ўрнатилган тартибда хизмат текшируви ўтказилганлигини маълум қиламиз, дейилади муносабатда.
Муносабатда хизмат текшируви натижалари ҳақида айтилмаган. Сурхондарё вилояти ИИБ ЖХХ ЙҲХБ Ахборот хизмати “Дарё”га билдиришича, ЙПХБ командирининг хизмат бўйича ўринбосари майор Бахтиёр Избосаровга танбеҳ интизомий чора қўлланилган.
Изоҳ (0)