Ижтимоий тармоқларда бухоролик аёл фарзандини дунёга келтириш вақтида вафот этгани ҳақида хабарлар тарқалди. Ҳолат юзасидан Бухоро вилояти Соғлиқни сақлаш бошқармаси изоҳ берди.
Маълум қилинишича, марҳума О.З. 1992 йилда Қоракўл туманида туғилган. 2024 йилнинг 12 декабрь куни, соат 21:50 да РИО ва БСИАТМ ДМ Бухоро филиали (перинатал марказ)га қабул қилинган. Ўша вақтда кучли шамоллаш аломатлари — йўтал, тана ҳароратининг 38 даражагача кўтарилиши, сув кетиши, умумий ҳолсизлик ҳолатида бўлган.
Қайд этилишча, беморда ҳомиладорлик камқонлик фонида кечган. Ҳомиладорликнинг 14 ҳафталик муддатида жигар эхинококи ташхиси билан оператив даволанган.
Бухоро вилояти ССБга кўра, керакли барча клиник лаборатор, инструментал текширувлар ўтказилган. Керакли мутахассислар (пулмонолог, терапевт) консултацияси ўтказилган.
Қўшимча қилинишича, консилиум асосида стандартларга кўра керакли даво буюрилган, кузатув давом эттирилган. Аёлда туғуруқ Миллий стандарт асосида олиб борилган, оператив туғуруққа кўрсатма бўлмаган.
13 декабрь соат 7:00 да тана ҳароратининг 38 даражагача кўтарилиши кузатилган. “Парацетамол” таблеткаси берилган. Келишилган шифокорлар консилиумидан кейин тор мутахассислар пулмонолог ва жарроҳ кўруви ташкил қилинган. Шу куни соат 12:30 да мунтазам туғуруқ дардлари бошланган.
Соат 14:25 да жадаллашган туғуруқ содир бўлган. Чақалоқ қиз жинсли вазни 4,1 кг, бўйи 53 см,
“Апгар шкаласи бўйича 7-8 баллда туғилган. Туғуруқнинг 3-даврини актив олиб бориш мақсадида “Окситоцин 10 ЕД м/г” қилинган. 3 дақиқадан сўнг плацента тўлиқ ажралиб чиққандан сўнг, бир вақтда 250 мл қон кетган, бачадон гипотонияси кузатилган”, дея қўшимча қилинади хабарда.
Шундан сўнг аёлнинг аҳволи бирдан ёмонлашиб, нафас етишмовчилиги белгилари кузатилган. Зудлик билан реаниматологлар ва керакли мутахассислар чақирилган.
Бемор кўрсатма асосида сунъий нафас аппаратига уланган ва интенсив реанимацион чора-тадбирлар бошланган. Беморда юрак фибриляцияси аниқланган. Юрак фаолиятини тиклаш ва фибриляциянинг олдини олиш мақсадида “Адреналин”, “Атропин”, “Солумедрол”, “Норепайн”, “Дофамин” препаратлари қилинган. Пулс периферияда аниқланмаган. Юрак фаолиятини тиклаш мақсадида дефибриляция ва юрак бевосита массажи қилинган.
15:05 да беморнинг аҳволи оғирлашиб, нафас етишмовчилиги, тери сианози кучайган. Кўз қорачиғи кенгайган, ёруғликка реакцияси йўқолган. Афсуски, 40 минут ўтказилган ўпка-юрак реанимацион чора-тадбирларидан сўнг ҳам юрак фаолияти тикланмаган. Соат 15:15 да биологик ўлим қайд қилинган.
Марҳума суд тиббиёт экспертизасидан ўтказилиб, ўлим сабаби сифатида қоғоноқ сувлари эмболияси тасдиқланган.
Ҳолат юзасидан Бухоро давлат тиббиёт институтининг профессор-мутахассислари иштирокида хизмат текшируви ўтказилган ва Республика ихтисослаштирилган “Она ва бола саломатлиги” илмий-амалий тиббиёт марказининг мутахассислари иштирокида муҳокама қилинган.
Тиббий ҳужжатлар юритилишида хато ва камчиликларга йўл қўйган ходимлар — марказнинг 2-туғуруқ бўлими мудири С.Р.га ҳамда даволовчи акушер-гинеколог З.М.га ўртача ойлик маошидан 30 фоиз жарима қўлланилиб, бошқа бўлимга ротация қилинган.
Изоҳ (0)