Ўзбекистонлик француз тили ўқитувчилари грант асосида Францияга малака оширишга юборилади. Бу ҳақда мактабгача ва мактаб таълими вазири Ҳилола Умарова хабар берди.
“Францияда бўлиб ўтган Халқаро Франкофония ташкилотининг 19-саммитида иштирок этдик. Саммит доирасида турли учрашувлар бўлиб, муҳим келишувларга эришяпмиз”, деб ёзди вазир ўзининг ижтимоий тармоқдаги саҳифасида.
Унинг билдиришича, 7 октябрь куни Ниццадаги Франкофония университети раҳбари Янн Либрати билан учрашди. Учрашувда Либрати Ўзбекистон француз тили йўналишида минтақавий “ҳаб”га айланишига ишонч билдирди.
Учрашувда турли малака ошириш дастурлари ва ўзаро тажриба алмашувларни жадаллаштириш муҳимлиги қайд этилди. Француз томони ушбу йўналишларда янги лойиҳаларни қўллаб-қувватлашини билдирди.
Учрашув сўнгида Мактабгача ва мактаб таълими вазирлиги ҳамда Ниццадаги Франкофония университети ўртасида 2025 йил давомида 200 нафар ўзбекистонлик француз тили ўқитувчиларини грант асосида Францияга малака оширишга юбориш бўйича келишув имзоланди.
Ҳозирги кунда Ўзбекистонда француз тили 600 га яқин мактабларда хорижий тил сифатида ва 100 га яқин мактабларда иккинчи хорижий тил сифатида ўқитиб келинмоқда.
Изоҳ (0)