Тошкент шаҳрида 17–25 октябрь кунлари Халқаро ҳамкорлик ташаббуслари ҳафталиги бўлиб ўтди. Турли соҳаларга доир мулоқотларда Ўзбекистон транспорт тизими истиқболлари ҳам муҳокама қилинди. Тадбир якунида транспорт вазири Илҳом Маҳкамов журналистлар билан суҳбатда бўлди, дея хабар қилди “Дарё” мухбири.
Илҳом Маҳкамов саволларга жавоб берар экан, “Афросиёб” поездларига чипталар нархи юқорилиги ва етишмаслиги билан боғлиқ вазиятни изоҳлади. Вазирнинг айтишича, ҳозирда темирйўлларда 6 та “Афросиёб” поездлари ҳаракатланмоқда.
“Афросиёб” поездлари ўзини ўзи оқлайдиган бўлса, бозор иқтисодиётига ўцак, унинг чипталари нархи оширилиши табиий. Республика бюджети бизларга “Афросиёб”дан ташқари бўлган транспорт воситалари, бошқа турдаги вагонларни субсидия қилиб бериш кафолатини олган. Биз юқори тезликда ҳаракатланадиган “Афросиёб”ни тижоратлаштиришга ўтяпмиз. Унга муқобил сифатида билет нархи арзонроқ бўлган купе ва электропоездлар бор. Ҳаммамиз “Афросиёб”га ёпишиб олишимиз нотўғри. Масалан, Самарқандгача фақатгина “Афросиёб” билан эмас, ҳар бир йўналишда “Шарқ”, “Насаф” поездларимиз мавжуд. Нарх масаласида сифатга қарашимиз керак”, деди вазирлик раҳбари.
Илҳом Маҳкамов “Дарё” мухбирининг “Афросиёб” поездларига чипта нархлари ошгани талабга қандай таъсир қилди”, деган саволига ҳам жавоб қайтарди.
“Тезюрар поездларга талаб ортиб бормоқда. Аҳолида жамоат транспортидан фойдаланиш улуши ошди. Чипталарни онлайн тарзда харид қилиш имкониятини яратиб беряпмиз. Бироқ ъонлайн сотувда билет йўқъ, деган эътирозлар билдириляпти. Ҳозир телефондан қараб беришим мумкин, чипта топиш мумкин. Ривожланган давлатларда одамлар ўзининг ҳаракатланишини ярим йил олдин режалаштиради, поездга билетларни ҳам ярим йил аввал харид қилади. Ҳаммаси режали бўлади. Албатта, бу табиий ҳол. 38 миллионлик аҳолимиз бор. Биз поездларга суткасига 1000–1200 кишига таклиф бераётганимиздан кейин, рейсга 5–10 кун қолганда, табиийки, улгурган одам чипта сотиб олаверади”, деди вазирлик расмийси.
Маълумот учун, 2024 йил 15 майдан “Афросиёб” электропоездларининг чипталар нархлари 20 фоиздан 40 фоизгача оширилганди. Хусусан, эконом классдаги вагонларда Тошкент—Бухоро йўналиши учун чипта нархи 403 минг сўм, Тошкент—Қаршига 338 000 сўм, Тошкент—Самарқандга 245 000 сўм этиб белгиланган. Бизнес ва VIP класс вагонлар учун чипталар нархлари 360 минг сўмдан 795 минг сўмгача етказилган.
Изоҳ (0)