Наманганда автомобилларни ижарага бериш йўналишидаги ижтимоий тармоқ гуруҳ ва каналларининг аксарият аъзолари мактаб ўқувчиларидан иборат. Бу ҳақда вилоят ИИБ ЙҲХБ бошлиғи, подполковник Мансур Газиев маълум қилди, дея хабар беради “Дарё” мухбири Азизбек Абдувалиев.
“Бот-бот тилга олинаётган ‘Наманган езда’ каналининг аудиториясини таҳлил қилдик. 3200 нафар аъзосидан бор-йўғи 150 нафарга яқини автомобилларни ижарага берувчилар, қолган 90 фоизи вояга етмаганлар, асосан, мактаб ўқувчилари”, дейди вилоят ИИБ ЙҲХБ бошлиғи.

Мансур Газиевга кўра, автомобилларни ижарага берувчилар билан бирма-бир мулоқот қилиниб, вояга етмаганларга машиналарни бериб юборишнинг ёмон оқибатлари ҳақида огоҳлантирилмоқда.
.jpg?_t=1745631026)
Фото: Оқилхон Мамажонов
“Суҳбат жараёнларидан маълум бўляптики, бундай шахсларнинг кўпчилиги ўзи автомобилини ижарага олган ёки кредит тўлаётганлар. Агар ўзи машинасини бошқариб, кўчага чиқса, кунига 200-300 минг сўм топиши мумкин. Ижарага бериб юборса, соатига шу пулни топяпти. Аммо автомобилни олган болалар нобуд бўлаётгани ёки ногирон бўлиб қолаётгани ҳақида ўйлашмаяпти. Автомобильига шикаст етказгани учун болалар ва уларнинг ота-оналари бўйнига 10-20 миллион сўм қарз илиб қўйилган ҳолатлар бор”, дейди Мансур Газиев.

Наманган вилоят ИИБ ЙҲХБ бошлиғининг таъкидлашича, автомобилини вояга етмаганларга ижарага бераётган шахсларга нисбатан жазо чораларини кучайтириш юзасидан тегишли таклифлар берилган. Бу борада депутатлар, жамоатчилик фаоллари ва ОАВ вакиллари билан ҳамкорликда ишланмоқда.
Йўлларда болалар ўлими
2024 йил ноябрь ойида Жиззах вилоятининг Бахмал туманида Cobalt катта тезликда вояга етмаган икки қизни уриб юборди. Шунингдек, Самарқандда автобус мактаб яқинида йўлни кесиб ўтаётган болани уриб юбориб, унинг ўлимига сабаб бўлганди. Сурхондарёда 1-синф ўқувчиси Nexia уриб юборишидан вафот этганди.
Сенат берган маълумотга кўра, 2024 йилнинг 5 ойи давомида жами 359 нафар ўқувчи билан боғлиқ йўл-транспорт ҳодисаси содир этилган ва 65 нафар ўқувчи ҳалок бўлган, 294 нафар ўқувчи эса турли даражада тан жароҳатлари олган. 2023 йилда болалар билан боғлиқ 1 794 та ЙТҲ юз бериб, уларда 1 568 нафар бола жароҳатланган, 263 нафари вафот этган.
Сентябрда Тошкентда BYD 9 ёшли мактаб ўқувчисини уриб юбориб, унинг ўлимига сабабчи бўлганди. Худди шу каби ҳолат июль ойида Навоий вилояти Хатирчи туманида содир бўлган. Катта тезликда ҳаракатланаётган BYD пиёдалар ўтиш жойидан ўтаётган 9 ёшли қизалоқни босиб кетган. Ўша ойда Самарқандда 7 яшар бола автомобиль уриб кетиши оқибатида вафот этди. Апрелда Жиззахда содир бўлган ЙТҲ оқибатида икки нафар мактаб ўқувчиси ҳалок бўлди.
Болалар иштирокида аянчли ЙТҲлар кўпайгач, жамоат фаоллари йўлларда болалар ўлими учун сиёсий жавобгарлик бўлиши кераклигини айтди.
Изоҳ (0)