Uzbekistan Airways қишки таътил олдидан талабалар учун чегирма эълон қилди. Бу ҳақда компания ахборот хизмати хабар берди.
Ўрта махсус, касб-ҳунар ва олий таълим муассасалари талабалари учун 23 декабрдан 2025 йил 7 январгача амалга ошириладиган барча маҳаллий авиақатновлар эконом-класс авиачипталарига 50 фоизгача чегирма берилади.
Чегирма давлат муассасасида ўқишни тасдиқловчи ҳужжат асосида тақдим этилади.
Олий таълим, фан ва инновациялар вазирлигининг тегишли буйруғи билан олий таълим ташкилотлари талабалари, техникум, коллеж, касб-ҳунар мактаби ва академик лицейлар ўқувчиларига 2024/25-ўқув йили учун бериладиган қишки таътил 2024 йилнинг 25 декабридан бошланади ва 2025 йилнинг 7 январига қадар (шу куни ҳам) давом этади.
Вазирлар Маҳкамасининг “Олий, ўрта махсус ва профессионал таълим муассасалари талаба ва ўқувчиларининг қишки таътилини ташкил этиш тўғрисида”ги қарорида Транспорт вазирлиги Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда талаба ва ўқувчиларга қўшимча қулайликлар яратиш ҳамда уларнинг ҳудудларга ҳаракатланиш имкониятини ошириш мақсадида ҳар йили қишки таътил кунлари уларнинг яшаш жойларига боришлари ва таълим муассасасига ўз вақтида қайтиб келишлари учун вақтинча кўпайтирилган транспорт воситалари қатновини йўлга қўйиши лозимлиги белгиланган.
Изоҳ (0)