Тошкент вилоятида эр-хотин ва уларнинг 8 ёшли фарзанди ис газидан вафот этди
Тошкент вилоятининг Бўстонлиқ тумани, “Фазогир” МФЙда яшовчи фуқаро Н.Х. 19 декабрь куни туман ИИБ бошлиғи номига ариза билан мурожаат қилди. Бу ҳақда Бош прокуратура матбуот хизмати “Дарё”га хабар берди.
Фото: “Дарё” / Азизжон Эрматов
У ўз мурожаатида ушбу маҳаллада яшаган опаси 1989 йилда туғилган Н.С., поччаси 1981 йилда туғилган Б.С. ва жияни 2016 йилда туғилган Б.М. яшаш хонадонида вафот этганини маълум қилган.
Бўстонлиқ туман суд тиббий экспертизасининг дастлабки маълумотномасига кўра, Н.С.нинг ўлими ис газидан заҳарланиш оқибатида содир бўлган.
Ҳолат юзасидан туман прокуратураси томонидан терговга қадар текширув ҳаракатлари олиб борилмоқда.
Ис газидан вафот этаётган фуқаролар
2024 йил март ойида Фарғона вилояти Бешариқ туманида бир оиланинг уч аъзоси ис газидан заҳарланиб вафот этганди. Тошкент вилоятининг Янгийўл туманида эр-хотин ис газидан ҳалок бўлди. Октябрь ойида Қорақалпоғистоннинг Нукус шаҳрида уч киши ис газидан заҳарланиб вафот этди. Ноябрь ойи бошида Андижон вилоятининг Жалақудуқ туманида 4 киши ис газидан заҳарланиб вафот этди. 12 ноябрда Бухоро вилояти Когон шаҳрида аёл ва унинг вояга етмаган фарзанди ис газидан вафот этди. 18 ноябрь куни Наманган вилоятининг Поп туманида бир оиланинг 3 нафар аъзоси ис гази қурбони бўлди. 7 декабрь куни Андижонда уч нафар фарзанди бўлган эр-хотин кўмирдан чиққан ис газидан вафот этди. Тошкент вилоятининг Пискент туманида 14 декабрда тўйи бўлган келин-куёв 15 декабрь куни ис газидан вафот этди.
Изоҳ (0)