Ҳиндистоннинг Кашмир водийсини мамлакатнинг бошқа ҳудудлари билан боғловчи дунёдаги энг баланд темир йўл кўприги очилди. Бу ҳақда бош вазир Нарендра Моди Х ижтимоий тармоғидаги саҳифасида маълум қилди.
Кўприк Ченоб дарёси устидан ўтади. У денгиз сатҳидан 359 метр баландликда қурилган. Иншоотнинг умумий узунлиги 1,3 километрдан ортиқни ташкил этади.
Ченоб темир йўл кўприги дизайндаги ихтирочилик ва қурилиш маҳоратини намойиш этади. У алоқаларни мустаҳкамлайди, шу тариқа савдо-сотиқ, тижорат ва туризмни рағбатлантиради, деди Ҳиндистон бош вазири.
6 июнь куни кўприкдан илк бор иккита йўловчи поезди ўтган. Мазкур кўприк 272 километрлик Удхампур—Сринагар—Барамулла (USBРЛ) темирйўл линиясининг бир қисми ҳисобланади. У Жамму ва Кашмирнинг олис ҳудудларини Ҳиндистоннинг қолган қисми билан боғлайди.
2003 йилда бошланган қурилиш ишлари Ҳиндистонга 160 миллион долларга тушган. Кўприкда -10 даражадан +40 даражагача бўлган ҳароратга чидамли пўлат материаллардан фойдаланилган.
Изоҳ (0)