Эрондаги хорижий дипломатлар, уларнинг оила аъзолари ва бошқа фуқаролар Туркманистон орқали эвакуация қилинди. Бу ҳақда Туркманистон Ташқи ишлар вазирлиги хабар берди.
Туркманистон эвакуация учун ўз ҳудудини тақдим этган. Мамлакат Эрондан келаётган чет эл фуқароларига инсонпарварлик ёрдамини кўрсатган. Туркманистон чегарасини тахминан 120 нафар фуқаро — Қозоғистон, Қирғизистон, Ўзбекистон, Тожикистон, Руминия ва бошқа давлатлар вакиллари — кесиб ўтган. Уларга транспорт воситалари, овқат, меҳмонхона ва зарур кундалик эҳтиёжлар билан ёрдам кўрсатилган.
Гуманитар ёрдам доирасида Туркманистоннинг тегишли давлат идоралари хорижий давлатлар элчихоналари ва халқаро ташкилотлар билан яқин ҳамкорликда ишламоқда, дейилади хабарда.
Туркманистон БМТ Бош ассамблеяси томонидан ўз ташаббуси билан эълон қилинган “Халқаро тинчлик ва ишонч” йилида инсонпарварлик, халқаро ҳамкорлик ва яхши қўшничилик тамойилларига содиқ эканини таъкидлади.
Ўзбекистон Ташқи ишлар вазирлигига кўра, 30 дан ортиқ фуқаро Эрон ҳудудидан Туркманистон ва Озарбайжон орқали муваффақиятли эвакуация қилинган.
Мазкур жараёнда яқиндан кўмак берган Туркманистон, Озарбайжон ва эронлик ҳамкасбларимизга чуқур миннатдорлик билдирамиз, дейди ТИВ вакили.
Фуқаролар хавфсизлигини таъминлаш учун барча зарур чоралар кўрилмоқда. Эрон ва Исроилдаги элчихоналар 24/7 режимида фаолият юритмоқда. Айни пайтда ушбу давлатларда бўлиб турган ўзбекистонликларга хавфсиз жойларда бўлиш, расмий ахборотларни доимий равишда кузатиб бориш ва элчихоналар билан алоқада бўлиш тавсия этилади.
Изоҳ (0)