АҚШ президенти Дональд Трамп 60 дан ортиқ давлатнинг товарларига 15 фоиздан 41 фоизгача бож жорий этиш тўғрисидаги фармонни имзолади. Бу ҳақда Оқ уй хабар берди.
-IWI5Csd1.avif)
Фармон 31 июль куни имзоланган бўлиб, 7 августдан кучга киради. Қозоғистон маҳсулотларига 25 фоизлик импорт божи белгиланган. Энг юқори тарифлар Сурия (41 фоиз), Лаос ва Мьянма (40 фоиз), шунингдек, Швейцария (39 фоиз) маҳсулотларига нисбатан қўлланади.
Европа иттифоқи, Япония ва Жанубий Корея учун эса 15 фоизлик қўшимча бож жорий қилинади. Рўйхатда кўрсатилмаган давлатлар учун эса ягона 10 фоизлик тариф амалда бўлади.
Оқ уйга кўра, бу чоралар “америкалик ишчиларнинг манфаатларини ҳимоя қилиш ва глобал савдо тизимини қайта ташкил этиш”га қаратилган.
Трампнинг Тўқаевга мактуби
АҚШ президенти 7 июль куни Қозоғистон раҳбари Қосим-Жўмарт Тўқаевга мактуб йўллади. Унда АҚШ 1 августдан бошлаб Қозоғистондан импорт қилинадиган барча маҳсулотларга 25 фоизлик бож жорий қилаётганини билдирди.
Трамп АҚШ ва Қозоғистон ўртасидаги савдо алоқаларини муҳим ва барқарор деб атаб, савдо балансидаги салбий кўрсаткичларга қарамай, ҳамкорликни давом эттиришга тайёрлигини айтди.
Қозоғистон Савдо ва интеграция вазирлиги баёнотига кўра, янги божлар АҚШга экспорт қилинаётган маҳсулотларнинг тахминан 95 фоизига таъсир қилмайди. Шунингдек, нефть, уран, кумуш, тантал ва титан каби асосий хом ашё ва стратегик товарлар бождан озод этилган.
Қозоғистон–АҚШ ўртасидаги савдо ҳажми
2024 йилда Қозоғистон ва АҚШ ўртасидаги савдо ҳажми 4,2 миллиард долларни ташкил этди, бу 2023 йилга нисбатан 4 фоизга кўпдир. Экспортнинг асосий қисмини нефть (56,2%), уран (16,4%), кумуш (12,2%), ферроқотишмалар (9,5%) ва тантал маҳсулотлари (0,89%) ташкил этмоқда.
2025 йилнинг январь–май ойларида икки давлат ўртасидаги савдо ҳажми 1,27 миллиард долларни ташкил этди, шундан Қозоғистондан АҚШга экспорт 418 миллион долларни ташкил қилган.
Изоҳ (0)